يأحمد اسمع هرجة اللى من العام=يدور الفرصة يخصك بتعليم
مرت ليالي يسهر الوقت مانام=يستعرض افكاره بمنهج وتقويم
زبدة تجارب يافتي ماهي اوهام =مثل الجواهر زاهيه بالتصاميم
ماقلتها شايف من افعالك الآم=لاوالذي نزل تبارك وحاميم
ساسك متين ٍمن خوالك والاعمام=مافيهم اللي ينقصه وزن مليم
وارجي من المولي تجي مثلهم تام=بافعال جدانك تقدي ولاتهيم
أخلص لربك في تعاليم الاسلام=تراه مايقبل بداله تعاليم
واقضب طريق الحق مع خير الانام=خلك علي السنة حريص ٍبتصميم
ولاتطاوع الشيطان في سفك الاثام=من طاوعه ماله عن النار تحشيم
وأد الصلاة بوقتها خلف الامام=هلل وسبح بالمساجد بتعظيم
وصوم الشهر حتي تكمل للايام=فرض ٍعلي المسلم صيامه بتسليم
والبس من التقوي عن النار هندام=تنفعك في يوم ٍفيه الخلايق مناديم
وامش بالدنيا علي نهج الاكرام=خلك عزيز النفس ماتقبل الضيم
والمرجلة احرص علي عسفها شمام=اسرج لها وقتك وشد المباريم
ولاتبرد اعزومك ولاتصير نوام=تري المراجل قسمت بالمجاهيم
خلك علي حقك حريص وخدام=لاتنكسر لو صار بالرجل تاليم
خل الطموح يصير للفكر رسام=واطلب من المولي جزيل المقاسيم
الطير لاعّـرّدعلي الصيد ماحام=تقصر اشبوره والنظر فيه تعتيم
وخلك مع اربوعك كريم ولزام=حتي يجونك بالشدايد محازيم
اللابه اللي بالمواقف لهم زام=لاقامت الهيجا يجونك مقاديم
رجالهم يارد علي الموت جزام=يرخص برحه دون حق الملازيم
اوصيك فيهم يالندواي بالاكرام=شيبانهم ورجالهم واللي مفاطيم
ولاتخاوي الاشبل من نسل ظرغام=ماحدن سمع في سيرته ذكر تذميم
ينفعك في هرجه علي الصدق علام=يروي من الماضي تجارب ملاهيم
ينهاك عن زلات رجلك والاقدام=ويشرح لك الموقف بحكمة وتفهيم
واحذر تشيل الدين وتصير غرام=إقصر لنفسك لازمت لتواهيم
لاتخدعك نفسك وتبني بالاوهام=شيء عن الواقع بعيد المراسيم
النفس تعشق يافتي درب الاحلام=فكر وميز في حساب الخواتيم
وفي مجلس الشجعان قانون واحكام=إحذر حصانك تسرجه للهذاريم
يسمج مقامك وانت من رؤس الاقوام=اللي لهم في مجلس العز تكريم
وصلاة ربي عد مابالسما حام=وإعداد ماتمطر علي الارض من ديم
علي رسولنا المبعوث في دين الاسلام=فرض علي المسلم يخصه بتسليم