منتديات البدارين - لا ضــاق صــدري

منتديات البدارين (http://www.albdarain.com/index.php)

- ديوان الشاعرفهد بن نفيع بن محمد البدراني (http://www.albdarain.com/forumdisplay.php?f=127)

- - لا ضــاق صــدري (http://www.albdarain.com/showthread.php?t=10137)

لا ضــاق صــدري

لا ضاق صدري من زعل واظلم الكون
والقاف قابلنــــي وهو مستــــولّي

أصوغ بيتٍ حد حربة ومسنــون
الشعر سيفٍ بالملاقى يسلــّي

سلام للي قد عطى الوعد مضمون
وأنا انتظر والوعد طوّف وزلّي

وين أنت عن علمٍ بنيته على هون
علمك وصل ولا الوفاء ما وصلّي

إن كان عرفك صار من دون قانون
المعرفة تبني بيــوتٍ بظلـّـي

المعرفة من دونها الناس من دون
من دون علمٍ للمراجل يعلّي

انشد عوارف ناس بالحق يوفون
واشرح لهم وش صار منك وحصلّي

إن كانها غلطة ترى الناس يخطون
قدام يكتبــها القلم بالسجلــّي

الله خلقك بفكر مع سمع وعيون
ياكيف درب الحق له ما تدلـّي

فزيت لك من يوم رن التلفون
وزودٍ على ذلك أرحب واهلّي

ارهيت في طيبك وخابت بك ضنون
ماتحتمي قولك ولاجبت حلّي

إن جيت عديتـك من اللي يعـدون
ون رحت ما غيرتني عن محلّي

تم الكلام ولابقى شي مكنون
حبيت أنوّه واذكر اللي حصلي

الشاعر العذب / أبو عبدالعزيز
صح لسانك واعتلا شأنك
مبدع وقصيدة جزله ورائعة وننتظر المزيد
لك فائق التحية والتقدير

الله الله

صح لسانك اخوي فهد وبيض الله وجهك قصيده اكثر من رااائعه كتبت وابدعت

احترامي وتقديري

صح لسانك يافهد واعتلا شانك وبيض الله وجهك
قصيدة رائعة

أبو عبد العزيز والله اني حاولت أقتبس بيت من القصيدة لقيتها كلها كافيه ووافيه
بدون مجاملة شاعر جزل بمعنى الكلمة فأنا لا أجامل أحد على حساب الشعر اللي يعجبني ابين له اعجابي واللي غير كذا أحاول اصد عنه بدون تعليق عشان لايزعل أحد مني .
والمنتدى يفخر بتواجد أمثالك من الشعراء المميزين ، أتمنى لك التوفيق .
وصح لسانك على كل بيت وكل حرف كتبته .
ولك خالص الود والتقدير ،،،