منتديات البدارين - عيطموس الفكر

ياقلب خلك مع الهاجـس ودالوبـه
ون لجلجت عيطموس الفكر لجلجها
زود لهبها لهـب والنـار مشبوبـه
ترا النعومـه ليـازادت تسمجهـا
مادامها حـرةٍ ماهيـب مقضوبـه
اطلع مطاليعهـا وانهـج مناهجهـا
شرايدٍ من بنـات الريـح مجذوبـه
الخـد ميدانهـا والفكـر يسرجهـا
تجيك مثل الذهب والماس مصبوبه
تبرد سواعير صدري من توهجهـا
لايا بعد من يعيب ويجهل اعيوبـه
عينه على الناس قصده بس يحرجها
وقت الرخا يسحر الجهال باسلوبه
سليط ومحايلي يعـرف مخارجهـا
كل المفاهيم حسب اريـاه مقلوبـه
ايدرهم المخطيـه والـلا يدرجهـا
وليانخيته نـزل رأسـه العرقوبـه
والهرجه اللي قبل ماعاد يهرجهـا
ايوالله اني طويت ارشاي من صوبه
اللي وجيه المراجل عمد يسهجهـا
الياحمت شمسها واشتـد لاهوبـه
روس الحمايل لياحجت حجايجهـا
ربع الشدايد وروس العز معصوبه
تثني ليا دلبحت فزعـة حوايجهـا
تقوم من طيبها ماهيـب مغصوبـه
لـو المنايـا تنطحهـا وتدرجـهـا
خطلان الايدي وكلن دون ماجوبـه
اكبود تسحن لهـا وكبـود تبهجهـا
جدانهم ورثوا طيـب وتواصوبـه
الشرع دستورها والحـق منهجهـا
ادناهم ان قلت تكفا ضاقبـه ثوبـه
يرمي بروحه وماجابـت نتايجهـا
ترجمت من ضيقتي غايه ومطلوبه
لاضاق صدري بنات الفكر تسرجها
ومدام الارزاق والاقـدار مكتوبـه
تضيق عنـد البشـر والله يفرجهـا

للشاعر/// مجعد بن متعب الرشيدي