سر يا قلم مالي على الصبر طاقه = صبراٍ تعدى الحد ما عاد ينطاق
اكتب لمثلي قصته وأشتياقه = في خطك الواضح على بيض الاوراق
قصة حزينٍ صافي المر ذاقه = وإليا ذكر ما صار له خاطره ضاق
باقو به الأصحاب و الوقت باقه = وأصبح ضحيه بين بايق وبواق
يمشي وهو ما حس في كسر ساقه = أمسى على ساقين و أصبح على ساق
وهذي سوات الوقت شين إصطفاقه = الوقت لو يصفيلك أيام دراق
إن شان قطّع معك كل العلاقه = وإن زان خلى لك مع الناس عشّاق
ومن شان معه الوقت قلوا رفاقه = وراحت حياته كلها هم و اقلاق
والله خلّق خلقٍ تحب اللباقه = كما خلّق له خلق ما عندها أخلاق
أحدٍ يعيش بخير وأحد بنفاقه = وأحدٍ يعيق أيام و أيام ينعاق
وأحدٍ معه حكمه وصبر ورواقه = سبحان منهو للمخاليق خلاق
لكن يا من معك عقل و وثاقه = أبنصحك كانك للأمثال تشتاق
لا تنخدع بأهل العلوم الدقاقه = اللي سوالفهم توهق توهاق
صادق رجالٍ يعرفون الصداقه = يقفون صفك يوم يبسات الارياق
و منهو رغب فرقاك فأرّغب فراقه = جاز الذي يجزيك بفراق و افراق
و تعلم التعشيق قبل السواقه = لا تحسب انك بالدرقسون سواق
و رزقك يجيك بدون تحضر بطاقه = عند الله المعبود تقسيم الارزاق
يقولها اللي جاير الوقت عاقه = و لا زال في غيبوبة الهم ما فاق
و من انعزاقه عايشٍ بإنعزاقه = و اللي يوده صار شوفه بالأشفاق
و لا قال هذا القول قصده طفاقه = ما قال هذا غير من نار الأشواق