منتديات البدارين - ياقوم ياللي تذبحون الحيل قدرٍ للضيوف

ياحرفي اللي ضاع مابين الدفاتر والرفوف ..........اللي رسمته مـن تنهَّاتـي ومـن حبـر قلمـي
ضحيت لجله في حروف وقمت لجله في حروف ..........وصبرت لو النار من فوقي ومن تحت قدمي
ياصاحبي اللي على شانك تحديت الضروف ..........اسمع كلامي زين وافهم وش اقوله مـن فمـي
ماهو بأنا اللي تتركه بين الخناجر والسيوف ..........وتمص دمه بين خلـق الله يامصـاص الدمـي
انا بدويٍ ماسكن في الوقت مسكان الضعوف ..........اتبع هوا بالـي واسيـر عنـد ذودي وغنمـي
طوفتها لك لجل خاطر عين ولا ماتطوف ..........ولا انت مهما زاد وزنك وزني يطرحـك نسمـي
صمتي يدل اني وفي ومسويٍ فيك امعروف ..........وصبري يدل اني من زحول الصناديـد انتمـي
ياقوم ياللي تذبحون الحيل قدرٍ للضيوف ..........وش رايكم في اللي يعشيني مـن اوصـال لحمـي
وقفت له يوم اجلسوا واجلستله ناسٍ وقوف ........غير الذخيره والفشق في محزمـه مـن محزمـي

الشاعر,,, تركي الميزاني