للموت حزه ياعسالله يعيني=مع غفلة الايام كم ناظر"غاب
حق" على كل العباد اجمعيني=ولا له علامه بينه ياهل الالباب
نركض ورى المجهول طول السنيني=يفتح لنا بابن ويقفل لنا باب
اللي سبق واللي من اللاحقيني=يوم يحطبنا تقل فاروع حطاب
للي خلقنا يابشر راجعيني=يوم"يحاسب كل مخلوق بحساب
يارب تلهمنا الصبر واليقيني=يامقدرن عمر البنادم والاسباب
قد قلتها ياعمي موادعيني=وداع يالدوحه تواديع الاحباب
ليلة هلال العيد للصايميني=الكلمتين اللي بهن خاطري طاب
وذكرت يوم اعايدك مرتيني=عيدية موادع لها القلب نداب
مرحوم ياعز الجناب المتيني=ياعمي اللي للجزيلات كساب
كسبتها ياعم دنيا وديني=يوم الزمان اللي على الروس غلاب
يابوفهد ياعزوة الطيبيني=يشهد لك الاجناب قدام الاقراب
ان قلت قلب الذيب ذرب وفطيني=وان قلت راس الداب راس العدو شاب
وهتان جودك مثل وبل الغشيني=يامورد الهياب فكاك الانشاب
عز الرفيق ومدهل الغانميني=عوق الحريب اللي له رماح وحراب
من يجبر اليتم الحقيقي بعيني=يتم المتون اللي شكا يتم الارقاب
ويتم اليسار اللي تعزي يميني=ويتم العيون اللي بلا حجاج واهداب
عساك بالجنه مع المومنيني=وبكفك اليمنى تسلم لك كتاب
جار النبي واصحابه الصالحيني=شرابك الكوثر و لك خيل وركاب

فهد بن ذعار البدراني