منتديات البدارين - رحلة وفاء لأهل الوفاء ومواقف وثقتها الاشعار(( بمجلس ضافي بن دليم ))

السلام عليكم ورحمة الله وبركاته
يطيب لي ان أنقل ماشاهدته لكم بالتفصيل اثناء زيارتنا لحرب أهل الابل بمنطقة النعيريه وماحولها..وماتبع ذلك مواقف وقصائد ..
.
.
في صباح يوم الاربعاء الموافق توجهت انا والشاعر العلم مرزوق بن مبشر الحثل في رحله استمرت يومين كان الهدف منها الزياره والتواصل والوفاء
كانت بداية الرحله من الرياض الى صالح بن ظيف الله القبع شمال الغنيميه ثم بعد ذلك توجهنا للنعيريه وكان برفقتنا من هناك ضافي بن دليم البدراني وسليمان بن عريفج الصبيحي وعيد بن حمد بن حصين البدراني وكانت وجهتنا للشيخ مفرح بن مرزوق الجميلي ذالك الجبل وصاحب المواقف المشرفه وأحد اعلام حرب بالمنطقه الشرقيه ,وأحد الداعمين لمزاين قبيلة حرب بـ 100000 مائة الف ريال .توجهنا له وكان مربع بإبله المغاتير والصفر بشرق النعيريه.تعشينا عنده وبتنا تلك الليله هناك وبعد الافطار الساعه الثامنه صباحا توجهنا غربا حتى وصلنا الى فهده (جبل معروف) وكان بتلك المنطقه اكثر ابل حرب .كنا نبحث عن سمير السعير السليمي وكان ابو هلال يقول لاشفت البيت اللي مشرف على حزم أنصه ترى هذاك سمير ومن عادته ماينزل الا على مرتفع.وبالفعل ومثل ماقال جلسنا بتلك المنطقه للعصر بعد ذلك توجهنا لضافي بن دليم بمنطقه تبعد اربعين كيلو وكان الدليله سمير السعير.
عند اقترابنا لموقع ضافي شفنا بيت شعر وقد عانق السحاب بمنظره من بعيد فقد كان على حزم مرتفع
وبجانبه كرفانات المجالس والغرف ومن حوله ذود ضافي (العاصفه)واللتي حققت المركز الاول بالشعل وذوده المغاتير .
حضرنا عنده وكان المجلس مصطك بحرب وبأجناب من قبائل اخرى من ظمنهم محمد بن غازي العتيبي.
تصدر مرزوق الحثل المجلس وسولف علينا من سوالفه وقصيده اللي يرفع الراس.
بعد ذلك طلب مني قصيدة مزاين حرب وجبتها
ثم طلب مني ضافي بن دليم قصيده بوصف المغاتير وجبتها وهي كما يلي :

ابكتب حسب عرفي ووصف خيار النوق=وكلآ على مايشتهي والرجال اصناف
شعاني غلا نياقن بها اببدع الطاروق=انا مولعن بالبل وفيها يزين القاف
عسى المزن لاقامت بوسطه تلوح بروق=على ارض الجزيره ينتثر وبله الهتاف
ومن اقصى الشمال لنجد وبل الخيال يسوق=عليها ثمان ايام والبرق له رفاف
ديارآ مريه تنعش الخاطر المخنوق=بها ينبت النوار والرمث فيها يشاف
مداهيل وضحآ تقطف الربل والزملوق=ليابكر الوسمى وعم الحيا الارياف
انا كل ماذكر حنية الخنجر المذلوق=على البال يطري خشم بنت ارثمن مشعاف
طويلة لحي وسبالها طايحه من فوق=وسنامن عريضن منفهق للفقار خلاف
من الحال شالت واكتنز نيها المفهوق=كما صوح رجمن لاتبين على مهياف
شناحن سهيفة خد وضحآ كما الغرنوق=لها غاربن مارق وسيعة نحر ميلاف
هجاجن بممشاها تزيد المولع شوق=لياهوبل اللي لشوفها عاشقن مزهاف
جلالة عظامن مثلها مايطب السوق=من الفخذ تشبر تسعة اشبار للاكتاف
فحلها سلايل هرشن أوضح بعيد عموق=عريض الفقار الافحج اللي عديم اوصاف
لها مدمعن مكحول والفم وسيع شدوق=تراخن اذانيها ورى الراس دوب تشاف
قنوها هل الطولات واهل الولع والذوق=لها ترخص الدم الحمر لاحتمى الميقاف
نحدربها للينه ونجنبها لساحوق=وحنا جنبها دون غازي وحواف
وكلن سلاحه بالطلب جاهزن مفهوق=لياصوتوا للحرب من ماضي الاسلاف

.
بعد مأنتهيت منها قال ضافي بن دليم
يامحمد جتك مني بكرتين من الشعل والمغاتير مع فحولهن مني هديه لك
ثم قال جزاع بن نفجان الشعبي ولك مني مثلهن يامحمد من المغاتير والصفر.
قلت لهم (اولا بيض الله وجيهكم ياضافي وياجزاع والقصيده اللي سمعتوا وطلبها مني ابو بدر قلتها أوصف مغاتير أحد ملاك الابل من حرب ولا ذكرت اسمه وجعلت القصيده مبهمه بوصف المغاتير بشكل عام لكي لاتوضع بغير محلها .اما بالنسبه لهديتك ياضافي وياجزاع اعتبروها مقبوله موفوره والله العظيم ماأسوقها لاناقه ولاجمل ولابكره ولاقعود وبيض الله وجيهكم.
.
.
انا هديتي حرب ليافازت بالعلم الغانم .
هديتي كل حربي ذكره يرفع الراس.
هديتي خبة النقع وما حصل بها من امور مشرفه
وبهذه المناسبه اقدم لكم هذه القصيده اللتي نظمتها فيما بعد والمعبره عن ذلك الموقف وبها وصف لما وجدنا من ترحيب وحسن استقبال من ربعي حرب ووصف لمنازلهم وأبلهم. وهذا اقل مايجب علي تجاههم.

ماتهون ياضافي ولايهون جزاع=يادروع ربعي يالسيوف الصقيله
ياللي لكم صيتن مع اهل الوفا شاع=لياسولفوا في كاسبين الجزيله
إلكم سلامي عد ماهب ذعذاع=وعداد براقن كشف بالمخيله
الطيب فيكم طبع ماهو تصناع=جزال العطايا مايديكم بخيله
تهدون غال البل حسينات الاطباع=ثلاث مية الف فيهن قليله
ووفرتهن مالي مقاصيد واطماع=توفير ماني خايفن من فشيله
طبعي وكلن في زمانه له اطباع=تكفي معزة كاسبين الجميله
هديتي ياحرب صيتن لكم ذاع=على الشرف ياهل السلوم الاصيله
لياصار للحربي على الغير مطلاع=مثل الحصان اللي ينومس صهيله
هديتي واللي له القلب مولاع=طيبن تميزبه عموم القبيله
جينا ديارن نبتها له تمرياع=ومرزوق وسمير السعير الدليله
وشفنا طروشن بالذهب ماهي تباع=إلهن مع الحكم نوع وفصيله
فرقهن اللي فارقن طول الاصباع=بأوصافهن وجرومهن المهيله
ولاصار للطرقي عليهن مهزاع=تحلب له اللي درها ينعنيله
بوسوم حرب مزبنة كل مرتاع=جمال التخوت اللي تشيل الثقيله
اللي لهم بديار الاجناب مرباع=من العصر الاول يوم بالوقت ميله
يوم الحدب لأرقاب الابطال قطاع=كم مقدمن راسه ربوعي تزيله
منزالهم بالتل عن واطي القاع=حتى يبين لكل ضيف ويجيله
مثل العقاب اللي له الرجم ميقاع= وصف البيوت المذريات الظليله
إليا زمت للشوف في روس الارفاع=يشوش راسي لشوفها بالطويله
وقفاتهم تبري عن الكبد الاوجاع=كان الشراره لامست للفتيله
ولا الردي لو موه الوجه بقناع=ليا احتمى الماقف عرفنا حصيله
الثلج لاحترت عليه الهوا ماع=ولا الجبل صلف الهوا مايزيله
ولاكل رجالن يبى يدل الاسناع=ولاكل من يركضلها تستويله
الا لمنهو لأمر رب الملا طاع=اللي يصل الفرض ويقوم ليله
يبى يجيه حصان الايام مطواع= ويزين له مركاب ذيك الكحيله

وسلامتكم
.
.
.
نعود للحديث عن مجلس ضافي بن دليم
بعد ذلك تكلم الشاعر محمد بن غازي العتيبي وقال انا عندي قصيده اقولها دائما بمجالس الرجال وهي للشاعر بدر بن عواد الحويفي
وجابها واللي منها

ياللي طلبتوا نبذة من قصيدي=عن واقع المعقول لاانقص ولا ازيد

.
.
بعد ما أنتهى منها شكروه الحاضرين .ثم قلت له ياعتيبي قال سم قلت بيض الله وجهك على قصيدة الحربي اللي انت جبت وجتك البشت اللي انا لابسها هديه والله ماتردها والله ما يجيني لها عوض ياحرب وياعتيبه الحاضرين قال بيض الله وجهك ياحربي وهديتك مقبوله
ثم قمت ولبسته البشت ويستاهلها.
((وكان ذلك من دافع الحميه لحرب والوفاء لهم ))
القصه هاذي وصلت الشاعر بدر بن عواد الحويفي بدون ما أدري عن ذلك.وكلمني ابو سلمان بعدها بيومين وشكرني على ذلك وقلت له يابو سلمان ماسويت إلا الواجب والله ما بغيتك تدري عن العلم هذا ولابغيته ياصلك ولا ابيك تشكرني على شيء يجب على اي حربي يمر بذلك الموقف ان يفعله
قال ابو سلمان سجل القصيده هاذي بجوالك وبصوتي
لكم القصيده بصوت الشاعر بدر الحويفي وبيض الله وجهه .قصيده من علم افتخر بها
يقول ابو سلمان

مشكور يالطيب على كل الاحوال=يامحمد المحسن كريم السبالي
مني لك البيضا على راس ماطال=تقدير يامحمد حميد الخصالي
فيك الحموه والثقافه ورجال=يحسب حسابك من زحول الرجالي
لك مع نوادر حرب ماقف ومنزال=لعل يفدونك جميع السفالي
بالمحفل اللي صار شاركت الابطال=باللايقه اللي مستواها مثالي
تستاهل التقديرياذرب الافعال =الله يمتع بك سنينن طوالي
شجعت ربعك بالفعايل والاقوال=وهاذي عوايد كل رجلن مثالي

اضغط على الرابط للتحميل اذا لم يشتغل الملف الصوتي اعلاه

http://top3gp.com/5/top3gp_35139725.3gp
وبيض الله وجهه.وصح لسان الشاعر بدر بن عواد الحويفي
.
.
كذلك بعد فتره اتتني قصيده من محمد بن غازي العتيبي ووجه لي قصيده رد ثناء وأنا أعتبرها إهداء لجميع قبيلة حرب
يقول الشاعر محمدالمرشدي العتيبي
اهدي هذه القصيده إهداء خاص للاخ الشاعر /محمد عبدالمحسن البدراني الحربي

رحنا نشوف الربيع اللي كسى جوده= في ديرة اهل الصخا مره وعجماني
ارضن عذيه ونبتن ماانصرم عوده=ريح الخزامى يعالج كل مرضاني
على الشرف مامشيت بطرق منقوده=امشي لحالي وأدور نجع عتباني
شفنا بيوتن بعال الحزم مشيوده=منهوله النزل قالوا نزل بدراني
تراه يعرف وكلآ دايم يروده=مير انشده يمكن انه يقصر العاني
جيته وسلمت والترحيب مردوده=قال ((المسى)) ..قلت ((انا طرقي وعجلاني))
قال ((انت حول وكلش نطلق عقوده))=وانت المعزب وحنا حساب ضيفاني
بشاشت الوجه سيما فيه معهوده=وهبه من الله ماهي من عند الانساني
ابو بدر سيرته تعرف ومحموده= اللي ضيوفه قراها روس قعداني
بيت الشعر سامكه والزل ممدوده=والنار تسرج عليها دلال رسلاني
له مجلسن عامرن بالطيب ووفوده=نوادر رجال شبانن وشيباني
ومجالس اهل التقى بالخير موعوده=رياض جنه ورحمه بامر رحماني
دارة سوالف وكلن جاب مجهوده=وتصدر الحثل للمجلس وناداني
واخترت درة بحر تعرف ومشهوده=شيخة قصيد الحويفي طير حوراني
اسطورة الشعر مسكن خالطه عوده=لوحة تثير المشاعر قبل الاشجاني
معها تفاعل عريب الساس من جوده=ورمى ببشته جزيل المد من شاني
رمى ببشته محمد فاخر الجوده=بشتن عن البرد بالصمان دفاني
حرآ قطامي معرب تقدح زنوده=والطيب ماهو غريب بذرب الايماني
وكلام شيخ الجهامه راعي الزوده=نهار فازع يقود الغزو حدماني
ارماحكم ياهل العادات محدوده= تعينوا له خذا المهره وخلاني
جهز نخاهم ونال الشيخ مقصوده=جته العبيه عليها سرج وعناني
واللي ركبها تعشى الذيب بعضوده=بالسيف جزوا رقبته حد الامتاني
ماهو ردي فارسن مغوار ياكوده= والدعوه اللي رمتبه بين فرساني
دعوة جهز في بطون الكتب موجوده= يتخى الدهاليس والبيضان من داني
نماذجن من فعايل حرب ماكوده= ولاخترت وحده تبى تكفي عن الثاني
اذكر مفاخر واجيب العلم بشهوده=ولاخير في كلمتن من غير برهاني
يوم القدايم وكلن حامن عدوده= واليوم بارض الوطن صدقان واخواني
عاداتنا ماتعدى الشرع وحدوده= ونعتز بالدين والسنه والايماني
والفايز اللي مطيعن لامر معبوده=ودنياك تفنى وكل اللي بها فاني
اعمالنا قدمنا باللوح مرصوده=ماضاع مثقال ذره شر وحساني
وصلوا عدد مايميل الغصن مع نوده= والطيب ماهو غريب بكل بدراني

وصح لساااااانه وهذا من وفائه وبيض الله وجهه

*ارجوا ان أكون قد وفقت بطرحي لهذه المواقف وماتبعها من قصاااائد مع مناسباتها وكان الهدف منها الفخر بحرب وبفعولهم اللي ترفع الراس مع الاجناب وبيض الله وجيههم ووجيهكم
ايضا لكم هذه الصور لكلا من
ضافي بن دليم البدراني الحربي
جزاع بن نفجان الشعبي الحربي
سمير سليم السعير السليمي الحربي
.
.
ضافي بن دليم مع ذوده الشعل
http://www.alganasah.com/test/up/br/thafi.JPG
.
.
.

جزاع بن نفجان الشعبي مع ذوده الصفر

http://www.alganasah.com/test/up/br/gazza.JPG

.
.
سمير السعير مع ذوده المغاتير
http://www.alganasah.com/test/up/br/smair.JPG
.
.
.

.