ياتركي اقول حاسب في مشاويرك= الصبر محمود والارباح ملحوقه
لوتطرق ابوابها مادامت لغيرك= وان طحت في بذرها ماتقدر تحوقه
سبحان ربن جمع شرك على خيرك= والا انت حتى الجدي يمكنك تفوقه
اتقول وتقول يامكثر تباشيرك= وشوف جبهتك ياذيبان مفلوقه
مدري شجاعه والا زود تقصيرك =ماقل جهدك وجسمك بانت افتوقه
لوتعتذر عندنا نسحب معاذريك= الثوب لو ترقعه ماتحصي اشقوقه
لكن طيع العرب والحق مخاسيرك= من قبل لاتصير بين الربع تريوقه
لاتدعي بالكمال وتشعب بعيرك= ترى البشر فيه سباقه ومسبوقه
ياتركي اشوفها كثرت معاصيرك= غطت على اخيالك اللي يسبق بروقه
اسمع كلامي وراجع في تقاريرك= يمكن كاس الحلاوه تقدر تذوقه
الصحبه الطيبه توقد دوافيرك= في بعض الاحيان والاحوال مزنوقه
تلقى بالاصحاب طيب يزيد تعطيرك =ان ماتعطرت عطره جاك منشوقه
وبعض الاصحاب منه تشوف تكسيرك=صارت عظام المعزه منه مدقوقه
الصاحب اللي يدور فك تجبيرك= خله ايولي عساها تابس عروقه
ربعك ربعك لا عميت تباصيرك= عونك منهم سهوم الوقت مطروقه
ممشاك معهم يكمل ضي تنويرك= ايبين نور الصباح وتكمل شروقه
وختامها طيعني حافظ على سيرك= اسمع كلامي بعد غنيت طاروقه