منتديات البدارين - صلفات الطواري

ياسعود صُـعت القلب من غير مقصود
وخليت صلفات الطواري اتسوقه

لاعاد تنشدني عن الحال ياسعود
عبرات صدري في الكظيم امخنوقه

ومن كثر خوفي من شماته ومنقود
اكن دمعي بين جفني وموقه

يبست اعروقي مثل مايابس العود
اللي التوا ساقه ويبست اعروقه

موجود في الدنيا ولاني بموجود
فكري معا شي تعّجز اطروقه

والهم ياخذ مني شوي ويعود
وصدري من الدنيا وساع ٍ افتوقه

يازوع قلبي كلما هبت النود
زوع الوَحَشَ ساعة تطلق اسبوقه

ماعاد في الدنيا طراوه ولافود
ولاعاد لي نفس عليها شفوقه

دنيا بها الشاقي بذل كل مجهود
والمشكله من بعد جهده اتبوقه

مادامت الدنيا لقيصر ونمرود
ولالحقهم من ترفها لحوقه

اللي شقا ماله معا ماكِتب زود
حتى ولو حلو الكرى مايذوقه

وعن ما كِتب ماهو بناقصه معدود
لوكانت الحساد تحته وفوقه

ومن لاكسب شيمه ومن لابذل جود
قله ترا الدنيا ختولً سروقه

والناس خِلقت للعباده لمعبود

لايحسبنها للفلوس امخلوقه

للشاعر // عبدالرحمن بن بديع