[ساري]

اخواني الاعزاء

السلام عليكم ورحمة الله وبركاته

اتمنى ان اعرف كاتب هذه القصيده فمن لديه المعلومه لايبخل بها علينا

ياليت في يمناي خمسة ملايين=رزقن من المعبود كسبن حلالي
وافك جوع اللي ليا جو ناصين=وارفي حوال اللي بهمه شكالي
واحطلي قصرا وبالقصر ثنتين=ومثومنن في جال ناره دلالي
ويامرحبا بالضيف مليون وثنين=ترحيبتن من قلب للي عنالي
يلقى الشحم والهيل وسط الدواوين=في مجلسن ينصاه ذرب العيالي
وليا سطع بالليل ضو البراكين=من بارق الوسمي صدوق الخيالي
وحل الربيع وشدوا البدو عجلين=ناصين برقن لاح ضوه شمالي
احطلي وضحن بوسم البدارين=وهاذي طراة القلب يومه بدالي
ومن اول شعاع الصبح بالوضح مقفين=مقفين للصمان مشيا عدالي
وليا اختفى ضوا من الشمس للعين= وحل المغيب وصار روضه نزالي
شبيت ناري والمخاليق ممسين=وصكيت على الحيران والبال سالي
واليا انفصخ ليلا وبالضو تبيين=والكيف زان وجلسوله رجالي
ربعن على كسب المراجل حريصين=امعربين اجداد ماهم حثالي
والصيد شيف وزان نقل الشياهين=في صحصحن فيه الحبارى جفالي
في صحصحن مسقيه ربي بنوين=ومن نابت الوسمي كسابه رمالي
وام سالم زادت الجو تلحين=زودن على تلحين عبس الشمالي
يازين ممشاهن على الهون يازين=في جرهدن ماللغنم به مفالي
من فوق جيبن صمموه لسلاطين=وبامر الطلب مجيوب ليه وجالي
واصخيت في مشراه غالي التثامين=ولاهمني غال دفعته لغالي
انا هوايه مع هل ااطيب والدين=وعلم الشرف والطيب هو راس مالي
وخطو الولد لاهد صيدله اسمين=صيده من الجزلات ماهن هزالي
من نسل حرا في فعوله براهين=يرسي على الصعبات لو هي ثقالي
ولا صار خطو اللاش همه على الشين=الطيب ماهمه دني الخصالي
انا اشهد انه صار همن على اثنين=اثنين يرجونه ولاهو يبالي
لانافعن ربعه ولا سد له دين=عارن على ربعه وللشين شالي
هذا مماته خير ياللي فهيمين=ولعل في موته تزول الخمالي
وصلاة ربي عد ناس ملبين= على النبي اعداد رش الخيالي