ياليل سجة خاطـري وانشراحـه= شوف القمر بين النجوم المدابيـح
الثلث قبل الفجر يشعـق صباحـه=ومع الصبا عج النفل عطر والشيح
اقبل يغطيـه الحيـا والسماحـه=صادق وحالت في طريقه سواميح
فرحت في لقيـاه والهـم زاحـه=لكـن عذبـات الليالـي مشافيـح
ياشين بعض احيان هرج الصراحه=لاصار سطحن نطح من غير تلميح
نشوة لقاء والصبح ينقض اجراحه=مادامت افراح القلوب المجاريـح
اسرع من الطيف الحياوي مراحه=لو اشعل اللحظه شموع ومصابيح
تل الخفوق ابنظرتـه واستباحـه=واغضى وحقق بالوساع الذوابيح
وارخا على بيض المحاجر وشاحه=ومجدلن يضفي على المتن ويطيح
قال الوداع وقلـت مافيـه راحـه=لاياشبيه اللي تذيـر مـع الريـح
اقفا وانا محتـار والسـد باحـه=الله يعين اهل القلـوب المجاريـح
للشاعر.. مجعد بن متعب الرشيدي