بسم الله الرحمن الرحيم
السلام عليكم ورحمة الله وبركاته
اليكم قصيدة سمو الامير عبدالعزيز بن سعود ,الســامر,
يليها مجارات سلطان الهاجري لها 00000
نجد بلياليها عن امثالها زود
لو كلها عند الاوادم ليالي
ياللي ليالي نجد بعيونكم سود
يابعدكم عن سر فهم الجمالي
غير الجمال اللي بالانظار مشهود
احساس خافي بين غالي وغالي
نجد بلياليها الى هبت النود
عانقت بالفكر النجوم العوالي
وادركت معنى سامي النبل والجود
اللي تميز به فعول الرجالي
دار الفهود اللي مناهيجهم كود
اللي منازلهم سنام المعالي
نجد الوفا00نجد العطا ماله حدود
نجد المروه والشموخ المثالي
نجد الهوى المصيون عن كل منقود
بالعصر الاول والعصور التوالي
لي مع لياليها مواثيق وعهود
العسر منها يسر والمر حالي
صح الله لسانك وللقصد مقصود
ماهوب ديكور من الروح خالي
سحابة ف اطرافها برق ورعود
ترعد حنوب وبرقها فالشمالي
يهيم معها هاجس الشعر ويعود
لاعظم ينابيع الوفا والكمالي
مولد قيم وامجاد وسهود ومهود
ومهبط رسالة عظمته والجلالي
ونجد بصحاريها بساتين وورود
على المواطن والرفيق الموالي
لبى خزامى نجد عنقود عنقود
ولبى صحاريها العراض الطوالي
احضانها دايم حجا كل مضهود
لا اشتدت الازمات ياهملالي
و كل ذي نعمه بلا شك محسود
للاصدقاء محور نقاش وجدالي
يعني ليالي نجد ما تعتبر سود
يوضي سناها نور حق وعدالي