[ابن شنوت]

مساكم الله بالخير,,,

محاورة الرياض بالامس كانت من افضل ماسمعت وشاهدت
من محاورات شعراء حرب
كانت حرب حاضره بقوه امس في سماء نجد
بفضل الله ثم بفضل شاعرها القادم بقوه (( معتق العياضي ))
الحفل كان (( للدواسر )) بحضور زيد العضيله وفلاح القرقاح وفواز الميزاني

حضر معتق فابدع بثقته وجمال صوته وقوة معناه وتوفيق الله قبل كل شي

حضرت المحاوره رغم المسافه بيني وبين العاصمه الرياض
حضوري فقط لمشاهدة شاعر حرب الجديد (( معتق العياضي ))

قال الشاعر معتق في بداية موالاته,, مع زيد العضيله

الليل زيدو صفكم ياشبابه ,, واخص ربعي حرب وايضا عتابه
تراي واحد والخناذف عصابه ,,قال المثل من عز نفسه وجدها
يانياف جمعلي شبابه يانياف, ابسري على خنذف وافرق شعبها
.........................

وجه له زيد العضيله ,,
اقول كلمه وانت حاضر وغايب,,طش العمايم من وراها مصايب
لكن طيع الشور من راس شايب,,قال المثل من عز نفسه وجدها
يامعتق علومك صارت اشكال واصناف,,ترا اللي يضيع سكته يحتلبها

رد معتق,,
اللي يشوفك قال وش ذا الوليده ,, طش العمايم ماينوش العقيده
قد طشها القرقاح شاعر عبيده ,, قال المثل من عز روحه وجدها
ترا اللي يقف بين الرياجيل ينشاف ,,؟؟؟؟؟؟؟؟؟؟؟؟؟؟؟؟؟؟؟؟؟(غير واضح في الجوال))

,,

ووجه له الشاعر فواز الميزاني ,,

يالحربي اللي ساكن بالمدينه ,, عليك سليت السيوف السنينه
وانته مع المطران مثل الرهينه,,على بساط الريح طارد ومطرود
توقع ياولد حرب من حمران الاعيان,,تراها بالمواقيف ماترحم عداها



قال معتق ,,,,
ان كان جيتم فوق ظلع منيفي,,وان جبت سيفك جبت هالحين سيفي
والله لامشيك قدمي بكيفي ,, على بساط الريح طارد ومطرود
تراني خصمكم يامطير في كل الازمان ,, ولاني حاسب كلمتك واللي وراها


وحاز معتق على اعجاب الجماهير الحاضره
واسمع عبارات الثناء دائما من الجماهير ممن هم من غير حرب
والتصفيق الحاار قبل الموال والقاف

بصرااحه شي يثلج الصدر وانشالله من تقدم الى تقدم لشاعرنا القاادم بسرعة البرق
وبعد المحاوره مباشره ارسلت بعض الابيات المتواضعه لمعتق على جواله قلت فيها,,

ماحيلتـي الا اردد القـول واعـيـد=الله يبيـض يابـن الاجـواد وجهـك
شرفتنا فـي نجـد يابـن الاجاوييـد=مافيه شاعـر ياولـد حـرب قـدك
الليـل ذا عنـدي مثـل ليلـة العيـد=لولا الزحام اجيـك واحـب خشمـك
الحـظ قايـم والليـالـي مسانـيـد=وانته خليفـة سيـد الشعـر وصفـك
تسدد المعنـي علـى القـاف تسديـد=واليا نويـت الفـوز ماحـد يـردك
مجدك سما والمجـد مافيـه تمجيـد=الله يسهل لـك علـى العـز دربـك
وحنا ترانا حـرب نوفـي المواعيـد=نبقى سيوف لـك بجـزرك ومـدك
نفرح ليـا شفنـا جماهيـرك تزيـد=وفيك نتفاخر لاطروا النـاس ذكـرك
جيتك مـن الدمـام شـوق وتناهيـد=ناصي الرياض ومقصدي زين شعرك
ماهـي غريبـه يافريـد الاوالـيـد=الطيب من جـدك ومـن جـد جـدك
جعلك تعيش وتبـدع القـاف واعيـد=الله يبيـض يابـن الاجـواد وجهـك

وبالتوفيق لشاعرنا ومن تقدم الى تقدم
وتقبلوا تحياااتي,,,