مساكم الله بالخير....
هذي قصيده اعجبتني وانشالله انها تعجبكم وفيها من الطرافه الشئ الكثير.....
(بعد الفقر حطت شريحه وجوال***يسعد مساءجوالها والشريحه
كانت تجيني تشتكي قله المال***وتصيح لاجاطاري الفقر صيحه
تقول ابويه دايم الدوم رحال***وامي كبيرة سن دايم طريحة
وانت الوحيد اللي لك القلب ميال***دايم تصارحني وانا له صريحه
طفله وانا معشوقها بين الاطفال***جريح حب وطايح له جريحه
كنا سوي نرسم على التربه امال***وأحلام تقتلها الحياة الشحيحه
كم دمعة كانت على الخد تنهال***واذانزلت ضاقت عليه الفسيحه
الله كم صرخه وهمسه وموال ****الله كم جادت علينا القريحه
نخيل لو مافي السماء برق وخيال***وانكذب الايام لو هي صحيحه
تقول لا حطيت لك بشت وعقال*** وسخر لك الرحمن عيشه مريحه
اخاف تتركني على عثره الفال***للفقر ووجيه الحياه القبيحه
وحبيتها بين الخلايق والازوال***حب يطول الوقت محد يزيحه
وسلمتها قلب تباريه الاهوال*** وطاح الخفوق وطيحه القلب طيحه
راحت وخلتني مع القيل والقال***شاعر صواديف الدهر تستبيحه
ودار الزمان وغير الحال بالحال***وجاها الزمان بكل ورده وشيحه
فله وخدامه ولكزس وجوال*** وانا عجزت ادفع رسوم الشريحه)
ضيدان بن قضعان..........