عرض مشاركة واحدة
قديم 28-04-2015, 12:55 AM   #1
افتراضي مشرع ابوابه وباب الفوادي

السلام عليكم ورحمة الله وبركاته


قصيدة لامست الحقيقةوذكرت صفات الوالد التي نادرا ان يتحلى بها غيره في شجاعته وحكمته في اراءه وقوة صبره على ربعه واقاربه لاخي ابو وريف فهد مبارك البدراني وهو شاعر جزل وتستحق على هذه العازفة النازفة حبة خشم

عزاه ياشيخ ٍ تقاصر به الحال
قصرت خطاه اللي منول بعادي
غدت به الدنيا وغثت له البال
والكبر مع زود المرض بإزديادي
ياكثر ما عانى من ظروف واحوال
لو مرت بغيره يعود رمادي
وياما لقى من دهره الوان واشكال
قليل من يصبر عليها وكادي
وياما حمل من حمل يعدمله جبال
مايرتكيله كود جيش بعتادي
وياما تحمل للجماعه من اثقال
وياما ظهرله ف الاقارب اعادي
وياما عطاهم طيب واكملهم اكمال
واللي عطاهم قابلوه بنكادي
تبرا الجروح وجرح الاقراب قتال
معروف عند الناس حاضر وبادي
ياكيف لو اسبابه رجال عقال
ما ينتعالج لو بطب وضمادي
يقطع حبال الوصل ويقطّع عيال
يصبح ولد هذا لهذا معادي
هذا وهو جرح ٍ يقطّع له حبال
وشلون لو سنوا سيوف ٍ حدادي
ياعنه لو يصبر غزا الكبد سلال
لو يهزم همومٍ غزنه جدادي
ياطيب راسه ماترك حمل ماشال
ويجاهد حموله و حاله جهادي
واليوم طاح وطيحته طيحت جمال
تليمت عليه من كل وادي
مع كل هذا ثابت بعزم لازال
يشور شور يدل من كان غادي
مال الدهر باابوي وابوي مامال
شامخ بعز وعز ماهو بعادي
رجال ماهو ياعرب بإي رجال
قليل من مثله بحسب اعتقادي
كريم مثل السيل من جال للجال
واللي يمره ماتكّلف ينادي
يلقاه بالمجلس ومجلسه مدهال
مشرع ابوابه وباب الفوادي
له نار حيه حولها جملة دلال
جايب حطبها سمر ماهو كتادي
لاصبله فنجال ياوي فنجال
يجلي عماس الراس زين القنادي
ياحي حيه في سلومه والاقبال
بالعرف والمعروف ملحٍ وزادي
ابوي مده جزل وعلومه جزال
من يعرفه يشهد ببيض الايادي
ابوي جار الجار بالحال والمال
و لا شكوا جيرانه اية تمادي
وابوي وافي ماغصب لوهو ريال
يعطي الحقوق اصحابها في ودادي
وابوي فزاع ٍ مع الناس شيال
يفزع فزوع ويبذل الاجتهادي
وابوي واضح دينه ودين محتال
واكره عليه اهل الحيل فالعبادي
وابوي نار ٍ تحرق قلوب الانذال
وابوي جنه مع شريف المبادي
له هيبه وسطوه بقوله والافعال
واذا عزم لامرٍ عزومه شدادي
حلحيل واعي لصعيبات حلال
وان معمعت له معمعه جاك هادي
واليا غضب ثورة براكين واهوال
واذا تبسم ورد فل ٍ وكادي
يالله تغفرله وترحم له الحال
يااللي عليك الامر والاعتمادي
واختمله بصالح وزينات الاعمال
واسكنه فردوسك وهي المرادي


فهد مبارك البدراني







التوقيع

يـا عــيــن حـــــذرا لايــجـــي خـــــدي الـــذرف
عــلـى االـمـقـفــي مـا لـحـقـنــي حـسوفــــــــات
ومــن لا حـسـب لــي بانفـلـه نـفـلـة الــــزرف
لا صــــار فــاضــي مــــا يــخــوض الـمـهـمـات

عبدالمطلوب مبارك البدراني غير متواجد حالياً   رد مع اقتباس