جل من يعلم عن اللي تخفيه الصدور ـــــــــــــ الكريم اللي شظايا العظام يلمها
قالوا ان الحق موجود قلت الحق نور ـــــــــ والرجال اللي مع الحق انا ماذمها
مير شفت الحق ناقص وبالبطل مخشور ــــــــــ بين ناس من الخلايق وانا ماأعمها
عقب مارزيت الاعلام في روس القصور ــــــــــ جالها سيلٍ يطم الجبال وطمها
مالها غير انت يالحر يالسيف البتور ــــــــــــ وانت ابوها ياطويل الذراع وسمها
وانت ابو فيصل ليا صمل العلم مخبور ـــــــــــ القريبة والبعيدة نظرك يزمها
في طريق القافلة سكروا باب العبور ــــــــــ وانت بشتك يدخل المستجير بكمها
عودوا من دونها اللي يخوضون البحور ــــــــــ كل ماواقوا على البير هابو جمها
وادخلت في غابةٍ وسطها ريحة نمور ـــــــــــ والنمور يعيفها الذيب حيث يشمها
واعترضها من دفنها مع اللي فالقبور ــــــــــ وان نشدته قال لا عاد تنقل همها
قلت ما انسى همها قال انا نفس الشعور ــــــــــ مير لو طالت وعرضتع تراني عمها
أنت ربي جاب لك صقر ماهو بالصقور ـــــــــــ الجزيلة يعترضها ويسفك دمها
واخطرت في خاطري كلمةٍقامت تدور ــــــــــــ أسمها عند القحاطين ياويل أمها
لا يوهمك التغطرس ويعميك الغرور ــــــــــ تحسب انك حولها وانت منت بيمها
أنت طيرٍ يمسك الريش وتطير الطيور ــــــــــ بالهوى يفرد كفوفه ونوب يضمها