يا الله ياللي من ترجاك ما خاب
.......................تجعل مقره بالجنان الضفيه
عواض ابن سواد للصيت كساب
...................عواض ابن سواد ملحق خويه
ياما ثناء قدام عكفان الأشناب
.....................من دون ريمة ما يهاب المنيه
كم فارس(ن) خلاه والخيل هراب
..............وكم جايع(ن) عشاه بارض(ن) خليه
رجل الوفاء عن ساحة الحرب ما غاب
....................بالسيف والشلفاء مع البندقيه
ضاري على خوض المعارك بلا حساب
......................ينحابهم من فوق بنت العبيه
وفي حرب نجد اللي دعت فيه الاسباب
..................حرب العرافة في ضواحي ضريه
وقف لهم بالسيف بتار الارقاب
..................أبن الرجال أهل الوفاء والحميه
ريف الضيوف وريف جارة والأقراب
......................راع الكرم والجود والشاذليه
فعايله يشهد بها أصحاب وأجناب
.......................نرفع به الهامات زبن الونيه
سجلت في مدحة من الفكر ما طاب
.....................وتليق باللي يحتمي كل هيه
كلمات : بــروق الأبـــرق