قصيدة بمناسبة حملة التضامن ضد الإرهاب التي بدأت في المملكة في العاصمة الرياض يوم السبت الموافق 25/12/1425هـ ومشاركة في الندوة التي أقامها مركز وادي الفرع بهذا الخصوص .
ارفع علم ما ترفع إعلام فوقه
بديت باسم اللي خلق برق ورعود=وينشي السحاب ثقال بأمره يقوده
حب الوطن في داخل القلب موجود=يمشي بوسط القلب داخل عروقه
دار بها الإسلام والعز والجود=واللي نواها بشر يسعى لعوقه
شعب وحكومة كلنا دونها نذود=هذا الوطن لازم يوفى حقوقه
ماكر حرار فهود وذئاب ووسود=من دونها ما احد يحط معشوقة
الصبر له قيمه وله وقت وحدود =وإذا تعدا الحد ما نطب سوقه
دون اللوازم نلحق النار بارود=كلن على الطالات نفسه شفوقه
الغدر والعدوان والظلم والكود=فعل النفوس اللي ظلال وبوقه
اللي هدفها غير واضح ومحدود=فيها اختلط شر النفوس الزهو قه
تكلي غضب مليانة شر وحقود=أفعالهم شينه ونفس محروقة
يازمرة الإرهاب تغشاكم السود=منكم يا كم مسلم تزايد خفوقه
متلبسين الدين والرب معبود=انه بعيدا عن نفوس صفوقه
الدين مثل الغيث نبات وورود=مثل الغشين اللي تلاعق بروقه
بعده خضار الأرض مع خضرة العود=فيه الحياة تزيد ويزيد شوقه
إما هل الإرهاب فاسق ونمرود=واللي خضع لبليس يكثر فسوقه
فاجر ومتطرف وضائع ومقرود=على الدار وأهل الدار يكثر عقوقه
سيف الفهد دائم مجهز ومجرود=على الظالم اللي مخبثاته طروقه
روس الظلال اللي عن الدرب بتحود=تقطف كما زرع تقطف عذوقه
حنا حفظنا العهد ونزيده عهود=مع الزعيم العهد صلبة وثوقه
فهد حكيم وراية الصلب مشهود=آن قال رأي ماش رأي يفوقه
وعبد الله ولي العهد بالخير معهود=يديه بالخيرات دائم دفوقه
وسلطان أبو خالد كما عد مورود=جزل العطايا واليدين الصدوقة
ونائف سديد الرأي والحشد محشود=الأمن هو عزه ودرعه وطوقه
حنا مع القائد فهد كلنا جنود =عدونا العلقم لزوم يذوقه
عدونا لو طال مبناه مهدود=نهد مبناته ونقطع عنوقه
هذا وطن من جملة الخلق محسود=محسود في دينه وأمنه وذوقه
من يوم أسس بنيها الطيب العود =ويمناه دائم للعدالة سبوقه
صارت تزود بمجدها دائم تزود=بعده عيال زودوا في شروقه
أقدم يابو فيصل ترى الضد مضدود=وارفع علم ماترفع أعلام فوقه
وصلوا عدد ما جاء لبيت الله وفود=على النبي راع الصفات الخلو قه
شعر: عبدالمطلوب البدراني