[عبدالمطلوب مبارك البدراني]

من يرفع شراع السفينة

العلم ما كله دراسة كتــــــب وأستاذ وفصــــــــــــل =العلم يحصل لك نتيجة خــــــــــــــــــبرتك والتجربة
اللـــــــي درسته بالسطور تطبقه قــــول وفعـــــــــــل= علمك يضيع أن كان ما طبقت شــيء تكسبـــــــــه
دنياك هاذي مدرسة فيها عواريف وجـــــــــــــــهل = لازم تنفـــذ مـــا تقولـــه باللـــــــسان وتنتبـــــــــــــه
وألا لا تنطق بالكــــــلام يقـــــال ما عندك عــــــقل =كلامــــــــك اللي تنطقه لك الخــــلائق تنسبـــــــــــه
ويا لـــــــو كل اللي يقال ينفذ بليـــــــــــــا جــــــــدل =كــان انتهينا من مشاريع الحياة المتعبــــــــــــــــــة
تهنا بذا الدنيــــا وشدينا السفينــــــــــة بالحبـــــــــل =من يرفع شراع السفينة والمجد مــــــــــــــن يكسبه
مايرفعه غير الرجال اللـي لها وزن وثــــــــــــــــقل=والاكثير الناس يحســـبها لعـــب في المـــــــــــــلعبة
بعض الرجال أخذه معك يطلع مـــعك رأس الجـــبل =يطلع معك رأس الجبل كل الجبل مــــــا يتعبــــــــــه
وبعض الخلائق معك ما يمشي يا لو وسط الســهل =حتى السهل وهو سهل لازم تـــــقوم وتسـحــــــــــبه
ترى الحمول اللـــــــــــــي ثقال تشـال في ظهر الجمـل=وألا الحـوار اللي كثير رغـاه حمله طــاح بــــــــــــــه
أنا مجرب هالحياة اطعمتها صــــــبّر وعســــــــــــــل =ماهو مجـرد هالكلام اللــــــــــي أقولـــــــــــــه واكتبه
ترى العسل ما تاصله ياللي مهيـــــبك الكــــــــسل =دونه نحـل يلسع ومن خاف النـحـل مــــــــــا يقـربه

الشاعر : عبدالمطلوب مبارك البدراني