السلااااااااام عليكم جميعاااااااااا
وصبااااح الخير والاجواء الجميله
غبت عنكم فتره لوجودي خارج المملكه وهاأنا اعود لكم بهذه القصيده اللتي نأمل ان تحوز الرضى.
.
.
جعل السحاب اللي نشى تالي عصير =اللي لربانه مع القاع ضبضاب
ينثر حقوقه بإذن وال المقادير=لاقام يردم بالسما كنه هضاب
على بلاد العز والدين والخير=ارض السعود مدلهة كل منصاب
ويعل دفاق المزون المزابير=دار(ن)غلاها لمهجة القلب سلاب
ياما عليها رملن الغنادير=يبكن قومن مثل ابازيد وذياب
وياكثر مافي بطنها من المغاوير=يومن دم القوم لترابها خضاب
هي عشقة اللي ينزحون الطوابير=عنيدة ماطاوعت كل خطاب
يالله عليها يهل وبل الشخاتير=ياخذ على شعبانها تسعة اوجاب
ويروي عروقن ناحتتها المعاصير =من عقب مايبسها سموم الهوا الهاب
وليا كساها الله بنبت المخاضير=وعج بفيافيها مثل ريح الاطياب
كلن بنى بيته بوسط الخاضير=مثومن العمدان ممسوس الاطناب
في ربعته تلقى الوجيه المسافير=وسوالفن تزهى عريبين الانساب
مشهلن مرفعن مبناه لجل الخطاطير=طبعن لحرا ماعرف صكة الباب
وتبى تجيك ابواش بدوا محادير =يبن نبتن مالهن عنه مجناب
ذاللي مجاهيمن وذللي مغاتير= وكلن فحلها يضرس الناب بالناب
ارضن نزلناها بحد البواتير=رهاف الخدود اللي لها الراس مضراب
من قبل لاتسور عن الشر تسوير=بحكم الملوك اللي لها قدر وحساب
وليااستوى مرباع هاك العثامير=ياما رعوه جدودنا بعلط الارقاب
اما بمجاهيمن مثل قارة النير= سودن وبرهنه تقل ريشة غراب
سند الغوارب والاذاني صناقير=مشرهفاتن كنهن راس مخلاب
شول اليدين ليانصنك مناحير=عراض الخدود اللي من اللني كراب
ولابمغاتيرن قنوها المشاهير =رخم الخشوم اللي كما حنية نصاب
وساع النحور ام الاذان المخامير=ماهي حراسيسن تبع لقصاب
غوالين ماشريت بالدنانير =كسبن لمنهو ينحر الموت ماهاب
بوشن نماريبه ورود ومصادير =ونمشي على ماطاب بديار الاجناب
في ضف من يثنون وقت المعاسير=شيوخ حرب اللي يفكون الانشاب
من فعلهم ياما شبع حايم الطير=لاقام من دون اللحي فتل الاشناب
على ظهور مسودسات المسامير =ولامعهم الا الشلف وسيوف وحراب
في فايتن يذكر بكثر المخاسير =الموت واجد والمعاويش الاسباب
واليوم حنا بخير والناس في خير=والامن حاضر بالوطن عقب ماغاب
وكلن شرب بيديه من جمة البير=بظل السعود اللي لها درع وحجاب