هذه القصيدة وجهتها للأخ القدير الشاعر / عبد المطلوب مبارك البدراني (أبو ناصر ) أقول فيها :
سلام يا راع الوفا والمــواجـيب = سلام من عندي لكم حق وافي
الصاحب اللي معتلي فالمراقيب = نكتب على شانه بحور القوافي
الذيب لاما يمشي إلا مـع الـذيب = يبعد عن رخوم البشر والضعافي
ونا جــعـلتك فالضلوع المحاديب = تجبر كسير ٍ طاح من شي خافي
أنا بلايه ريم ماهي مشــاعــيـب = اللي على أطراف العرب بالفيافي
من يوم شفته صوّب القلب تصويب = أبو مبيسم زاهـــي الخد صافي
ورموشه اللي زادت القلب تعذيب= حتى شعــرها اللي عليها لحافي
واللــه واللـي يعلم الجهر والغيب = واللي جعل من بيت مكة طوافي
جريح أنا حبه ومحتاج تطــبـيب = ما هــو بطب ٍ ينوجد بالمشافي
هــــذا بـــلايه وارسـل الرد تعقيب = أرجوك عجل بالدواء يا السنافي
= شعر / ضيف الله البدراني (أبووليد)
=وقد تجاوب معي مشكوراً بهذا الرد /
بديـت بالــلي مـن ترجاه ما يخيب = اللي علــيــمٍ بالــجـهـر والخوافي
ربـي يحــل المــعضـلات الصواعيب = والــلي لجــاله ما يجيه الخـلافي
ويامرحبا مليون ملــيـون تـرحـيـب = بالطيّب اللــي فــ( المواجيب ) يافي
ان جــاتــني رســائـله والـمـكاتيب = افرح بها واقول جاء الطيب لافي
يشكي هواء ست البنات الـرعـابيب = عمــهــوجة غيدا ترّب الشـعـافي
يقول منها شاف خــبث المشـاريب = اللـه يلومه صار قــاسي وجــافي
ولوانــهــا فــزعـة عيال معاطيب = وسل السيوف وضرب حد الشلافي
ابشر يا ضيف الله ترى نورد الهيب = مير البلاء جاء من ضبي الكشافي
ويقال تبع الحب بيــقرب الـشـيـب = قد جرّبه يــالـقـرم صقـر الـنصـافي
والصاحب اللي ما تجيبه مــهاذيب = عيفــه لاجل ما له دواء إلا العيافي
= رد الشاعر / عبد المطلوب البدراني (أبوناصر )