عرض مشاركة واحدة
قديم 02-08-2014, 12:07 PM   #1
افتراضي قصيدة موجهه للشاعر ابن كمي

أحد الأصدقاء من المعلمين طلب مني أن اكلم له الشاعر الحميدي المعروف ب( ابن كمي ) كواسطة كي يقبل في الجامعة معيد . قلت والله الشاعر لا اعرفه ولا يعرفني إلا من خلال الشعر . وإذا تبغاني أروح معك لبيته أو لمكتبه ابشر .
قال لا مايحتاج بس أبغاك تكتب لي قصيدة أطلب فيها فزعته ووقفته معي وجزاك الله خير . قلت بصراحة القصيدة إذا ماهي طالعه من إحساس صعب أنها تصل لقلوب الناس . قال ماعليك أنت اكتبها وربي يسهلها إن شاء الله .
قلت له من باب المزح طيب وإذا انقبلت بالجامعة إنا وش لي ؟ قال لك عشرين ألف .قلت بس
قال ثلاثين .
قلت ماابيلك لا عشرين ولا ثلاثين وان شاء الله راح يقبلونك بالجامعة معيد
والحمد لله ابن كمي ماقصر وبيض الوجه
وهذه الأبيات التي تم توجيهها للشاعر ابن كمي :

مني لبو محمد سلام وتراحيب = راع العلوم الغانمة نسل الأجواد
حر (ن) تعلى فوق روس المراقيب = رجل (ن) على كسب المعاريف معتاد
مثل الجبال النايفات المحاديب = الشامخات اللي لها فعل الأوتاد
أهل الكرم انتم وأهل المواجيب = تاريخكم واضح على روس الأشهاد
انته من اللي للجمايل معازيب = ماتنحصي لو عدها كل عداد
جيتك وفي نفسي هموم وملاهيب = لا مر يوم الحزن في داخلي زاد
فزعتك ابيها الحين وبعدين يا الذيب = كل الصعايب عندكم غصب تنقاد
في الجامعة حلمي تعدا المراقيب = كل عام أقدم لكن الحظ مافاد
والحين ابيها لو تجي بالمطاليب = تكفا وتكفا تهز من كانوا أسياد
هذه بيوت الشعر جاتك مناديب = وانت الفهيم بكل مقصد وميراد
= شعر أبووليد







التوقيع

أنا بـدوي والـجود أ ول شعاره= والثانية عندي مبـادئ وقـوانين
أحب من يوفي صديقة وجارة = وأحب من يمشي على منهج الدين
ربعي وناسي كلهم في الصدارة = كـل الـعـلـوم الـغانـمـة لـلـبـداريـن
وعندي عليها إثبات ماهي كبارة= أهل العقول الراجحة والموازين
أهل الوفاء والمرجلة والوقاره= ربعي بني بدران في العسر واللين
لا لاح برق الحرب واقدح شرارة= نصمد كما تصمد شموخ الضلاعين
حنـا لـنا البارود فــن ومـهـارة=وتبقى قـبايل حـرب سـم المعادين
=def-4444@hotmail.com
عبدالله مناور البدراني غير متواجد حالياً   رد مع اقتباس