[فهد نفيع البدراني]

راكب اللي لامشى كن مشيه في سماه
يوم غيره لامشى كن في مشيه حبي

لا ركبته كني اشرف على جبال السراه
جيب غيره ماهويته ولاهو مطلبي

جيب جي إكس آر ماظنك بتلقى حلاه
ومن يقول حلاه ماودي أقول يهبي

المواتر لحترامه تبي تمشي وراه
ماتقدم كود من له تحية يضربي

المهندس ما نمرّه ولا نبغي دواه
كل شيء ٍ به وكالة جديد مركبي

مايبي ياغير زيته وبنزينه وماه
لو نشدته غير هذي حلف لك ما يبي

صانعه لاما عرف للصيام ولا الصلاه
لا عرف ربه ولا عارف ٍ هدي النبي

بس مبدع بالصناعة وربي قد عطاه
الذكى اشهد بعرفه ذكي ماهو غبي

ماخسر من حط فيه الدراهم واشتراه
لو يكده اربع اسنين باع بمكسبي

قلت من يبغاله اديار والبعد يحداه
وش يسوي لضلم الليل عقب المغربي

قال تلقاني على الطيب واطلب ماتباه
ان بغيت بوجهة الشرق ولا المغربي

قلت أضنك ماتوصل لقلبي مابغاه
قال اها في سد وجهي بدقني وشنبي

غير توصل ديرة اللي سكن قلبك غلاه
ون اراد الله لتوصل لكل اللي تبي