لاوالله الا شـدوا الـبـدو نـجّـاع
كلـن هـدم مبنـاه وارتـد زملـه
شد الشديد وقوّضوا عقب مجمـاع
وراع المـوده فـرّق اللـه شملـه
شدوا ودنوا للحنـي كـل مطـواع
كل اشقحٍ يعجبـك لا شـال حملـه
غـدا لهـم دون الرفيعـه تمـزاع
كلٍ بغى دربٍ عـزل وانقسـم لـه
اقفوا كما نـوٍ نثـر مـاه وانـزاع
برقه يرفرف والسـدا يرتـدم لـه
يابكرتاه اللي غدت بيـن الاقطـاع
ويا بعد دورتها عن اللي جهـم لـه
الهقوه انـه يـم دخنـه بالاوقـاع
والا مع اللـي سنـدوا مستهملـه
ما هيب لا حاشي ولا هيـب مرجـاع
عفرا فتـاة وراعيـه ما وسـم لـه
ياغصن موزٍ ناعـمٍ لـه تمريـاع
امنين ماهب الهـوى مـال حملـه
راعي هدب عينن مضاليل ووسـاع
خرسٍ عيونـه والمحاجيـر جملـه
عليه ما وقفـت عيونـي بالادمـاع
هجسٍ يلاحقني على طـول سملـه
اعوي عوى ذيبٍ ورى النزل لاجاع
يقنب الين الله يجيـب اللحـم لـه
يامل قلبٍ من هوى الزين ينصـاع
كما يصوع الصيـد رامٍ خطـم لـه
حبّه يخج القلب ما يوجـع اوجـاع
لا شك قلبـي مودعـه بيـت نملـه
للشاعر //// فهيد المجماج