في راس مرقاب طويل وعالي = أجمع شتات افكاري المنثورة
لو ما طلعت الرجم كان اشوالي= بانت هواجس خافيه مستورة
لا وهني المستــــريح السالي = اللي ما همّـه غير لعب الكورة
يتابع الشاشات والارسالي = ويحلــل اللعبــــة بكــــــل الدورة
وانا هواجيسي كبـــار ثقالي = ياكم شوير ما نفعــني شــوره
وعن من نخاني ماتجذ حبالي= واشره على اللي رفقتـه مبتوره
للطيب واهل الطيب اشد رحالي= واترك بيوتٍ ماهي بمعموره
اسمع كلام الصدق ف( الامثالي) = كلٍ يقيس الامر من منظورة
وإن قلت اناابرهن جميع اقوالي=علم المعرفة غصت وسط ابحوره
واسمع نصيحه جالها مجالي = والهرج واجد مانــــفع مكــــرورة
احرص على تقوى العليم الوالي= اللي عبد ربه يزيد ســــــــروره
وكمل فروضك وانتبه ياغالي = واترك طريق العالم المغروره
والوالدين اللي لهم منزالي = تبرهم والهـــرج تترك زوره
وكرّم ضيوفك ياعريب الخالي= الرجل لضيوفه يجي مقدوره
والجار تعرف قدره الرجالي = عزي لمن جاره تضيق شعوره
دون الخوي خلك سوات الصالي = خلك كما حيد صعيب عبوره
اعطيتك الزبده وعلم جلالي = والا كثيــــــر اوامـــــر محذوره
واللي بذا الدنيا طمع متعالي = يحــــــذر تواليها ترى ممروره
دنيا تقلب بين مـــــــرٍ وحالي = ماجورة نفس العنى ماجــوره
من قبلنا راحوا بها الابطالي = يقال ذاك فلان وين عصــوره
تدرج سوات ادراجة المحالي = الله يكافي وقتنا وشـــــــروره
والدلو لامنه ضرب بالجالي = يضيع ماه ولا يقوم بــــدوره
وعد الحجيج وعد سيل سالي = صلو على اللي عم الامة نوره