[الحر النداوي]

سلام ياموفي حقوق الرياجيل=ياالوجه الابيض واليمين النديه
سلام احلى من حليب المباهيل=واطهر وأرق من النسايم شويه
وألذ واطيب من قناد ا لمعاميل =واصدق من بروقن سرت سامريه
قدمته لشيخ الشيوخ الحلاحيل=اصبر واسمي معزبي لك اهنيه
أمعزبي قاد المكارم اساطيل =جيوش عز وطيب ماهي عريه
ميراثه الناموس جيل(ن) بعد جيل=حاز المعالي غصب ماهي هديه
الشيخ نايف لافعل فعله يهيل = رمز المراجل مابها عنــــــصريه
كريم سبلا فالليال المغاويل =هذا ولد هاجد زبـــــون الونيه
وأبوه هاجد مايبي وصف تحليل = معروف عند الناس فالجاهليه
لادارت الهيجا وجنك مقابيل =يقلط على البارود والنار حيه
تجاربه فالناس صارت تماثيل = راسه عنيد وفيه نفس(ن) رضيه
يرحمه رب(ن) زوده بالتكاميل =صايم مصلي يومها سرمديه
من روس حرب اهل السيوف المصاقيل=واهل الوفا والطيب واهل الحميه
على حقوق الضيف قوم(ن)مشاكيل =وعلى المهار الشرد قوم(ن)صريه
عدوهم خاسر ولابه محاصيل=منهو يجابه مشترين المنيه
لامن تحدر جيشهم كنه السيل=يجرف بدربه كل جيش وسريه
تاريخ تقفيبه وتقبل مراسيل=مفروض يوضع درس فالمدرسيه
حرب(ن) تولع للمعزّه قناديل =لاواهني الطيب لاواهنيه
الليل صار بدارهم ماهو بليل=لاجيتهم مقبل تقول ضحويه
موجز كلامي لو تبي فيه تفصيل=لكن اخاف يطول وقت المسيه
هذا وأنا من عزوتن توفي الكيل =امطير ربعي والهقاوي رهيه