صح لسانك يا عوض بن ركيان البدراني على القصيدة الرائعة قد ابدعت بارك الله فيك
وبيض الله وجهك والشيخ محمد بن نايف بن راجح يستاهل كل خير ومن الرجال الذين
تفتخر بهم القبيلة في تواضعه وفي مواقفه المشرفه وتقبل مني هذه المجاراة المتواضعة
والشكر للاخ ابو عبدالله على نقل هذه القصيدة لنا
باسم الله اللي له نصلي بالاسحار = حي التجي له كل صبح وليله
تهيض الخاطر ودار الفكر دار = بعد قريت المفردات الجزيله
من شاعرٍ فكره على الطيب يندار= ابن ركيان ابدع بكل قيله
اللي نثر قافه كما نثر الازهار= في مدح شيخ الطيبة تنتمي له
محمد أبن نايف ولد شيخنا البار= عز الرفيق وكل حي يعنيله
يا مرحبا بالربع والضيف والجار = دايم على لسانه ولاهي قليله
للي لفاء بيته معزه ومقدار = والعود الازرق جنب بنه وهيله
صميدع من نسل وافين الاشبار= لو كان حمله كايدٍ يرتكي له
ابوه سيفٍ للمعادين بتـــــار = شيخٍ صدم كل القبيلة رحيــــــله
للطيب والمعروف والعرف بيطار= اذا كبر حمل القبيلة يشيله
للشيخ نايف بالمواجيب تذكار = من حدته سود الليالي يجي له
ان كبرت القاله وكثرن الاشوار= من جاه عاني له يبرد غليله
نسل الشيوخ اللي لهم صيت واذكار=تاريخهم يشهدلهم بالفضيله
عساه للرحمه وجنات الابرار= يا الله يا اللي كلنا نلتجي له
عداد ماهلت من المزن الامطار= صلوا على المرسول باحسن وسيله