مشاركة الشاعر فلاح بن مشعل البدراني في مزاين قبيلة حرب
سميت باسم عالم السر والغيب = منشي الخيال اللي سحابه مراديف
في رادة الله راينا دايم يصيب = وهوماتنا تختل منها المراجيف
حصل المجال وجاء مجال اللواعيب = واسعد مسانا مع الرجال العواريف
وتكفون خوذوني خوي ياهل الجيب = ترا حلاة العمر مزح وسواليف
من عند مبهل مدهل الفطر الشيب = متوجهين ليمة الجدي يامنيف
زوار حفل اللي ضيوفه معازيب = وجميع حربي في محله ماهو ضيف
يامرحبا في حرب اجمل تراحيب = اهل البلد وللي من السيف لسيف
ربعا تجمعهم على العز والطيب = مثل الجبال النايفات المشاريف
يامرحبا بالحاضرين الاجانيب = باللي نصانا وشر الحفل تشريف
حفل الربعي ناطحين المواجيب = نزالة الجو المربع اليا خيف
صعبين زينين بعض المطاليب = ودون الخوي والجار لهم مواقيف
وعرضاتهم بمشينات الاصاحيب = سند المتون ام الخشوم المهانيف
انهض لها ياراعي الصنف لا تغيب = حامينها بوقت العطف والغطاريف
وضحا مراجل طيبا له لتجاريب = ما جابها ولحدا عليها معاريف
ذيبا مليب وراع المرجله ذيب = شيخا تسمابه شيوخ ومضاعيف
ثم جت مجاهيم بعيدة مجاذيب = مثل البواخر شايلات المصاريف
وساع النحور مقلدات الدباديب = طوال المتون اللي عليها التواصيف
تجر عرقوب وراها تقل بيب = وفقارها مثل الدراويز ياخليف
وارقابها بالجو مثل العواسيب = وايدينها مثل ادلي المزاهيف
والاذن تفتن مثل شلفى تريحيب = ولحيا طويل وللبراطم نفانيف
ماتجي بمراحه ضعيف المحاضيب = الابل سلاطين العرب والعواريف
ثم عرضة شعل مع الزين تدريب = على الرحول مطبعات مواليف
مثل الجمال منزحات الشراريب = الله يعديها عيون الحواذيف
ثم عرضة صفر زيان ومراعيب = لها مواريد ولها مناسيف
ولها جوايز في يدين المناصيب = حدى الجيوب وخزنة بالمضاريف
يابعد عنها العيب يامدور العيب = ابعد من الليث الجنوبي عن طريف
وفي وصفها لو تطلع الشمس وتغيب = الابل عطايا الله وسيع المحاريف
والمعذره يامفتلين الاشانيب = ودي وودي بس ماهي على الكيف