مقعد العياضي وعلي زيد

[علي زيد]

ياعلي قلبي ضايق(ن) وين اوديه =دور لقلبي يالبناخي علاجه
عجل عليه باللي انت امتوريه =من منهل ياعلي له في زجاجة
الذ من نقع المطر من مناشيه= ساكن هواه ولا بجوه عجاجة
لاارخا هماليله وسالت سواقيه =لاهل الحلال بفرحته وابتهاجه
مثل العلاج اللي لخالك تهييه =عسى علاجك مايعكر مزاجه
ماكل رجلن غير ابن زيد ندعيه= ولابدي له الشكوى لوانا نتواجه
ماعطيه مكنوني ولا اشفق لخافيه= بيني وبينه بالضمير انحراجه
بينت لك بعض الهدف من مشاكيه =والبعض الاخر ياعلي بالمواجه
والغيب علمه ياعلي عند واليه =والخلق في ضوضاء غداله لجاجه
يزعجك جواله ولجة رواديه= نص العرب هالوقت فيه انزلاجة

الشاعر : مقعد محمد العياضي

قلبك يامقعد منتحي من يداويه =امكسر(ن) عوج الحنايا خلاجه
تنتابه الذكرى ومقفي لماضيه =ويعلن على شهب السنين احتجاجه
وانا ماني دكتورن له عن طواريه= قلبك وتدري ف هواه وخراجه
لكني اوصيك ماني موصيه =لو انت مالك في وصاياي حاجة
داوه بركعات الضحى لاتشقيه =ومقلب الابصار بالسر ناجه
واضحك بهالدنيا بليا مشاريه =وبالصبر ياريف المسايير داجه
وعوب الطواري كان تلن عراويه =جارن على صبره وهدن سياجه
خذلك خوين يعجب اللي يخاويه =دايم على يمناك طلق(ن) حجاجه
ماهو دويني عن هروجك تداريه= تداره عن مزحك مدارى زجاجة
وسج القدم حتى مع البيد تحفيه =بجو(ن) سرابه يطرد مع زراجه
فجن خلاوي ماتنقذ ضواميه =وسطه ردي الحيل يطفي سراجه
ترتاح من روتين يومن تعانيه =لاخذت في ذيك الفجوج ادراجه
لومابها لراع الولع مايسليه =قاعن يثوع يالعياضي عجاجه
صيده محا والعرق ماتت نواميه =من قو فعل التعرية تقل صاجة
سنين ماذاق الحيا رجع واديه= مافيه كاين حي تلقى مداجه
ماهو على خبرك تخير حلاويه =اقفى وصارت روضته في كراجه
ودنياك ماقفت فيه ماعودت فيه= شيبا قراء من طبعها الانعواجة
كم واحد(ن) ضاعت باثرها هقاويه =قضت قراحه واغدقتله هماجه
والعمر فيها سهوم الاقدار ترميه = يارب تنجينا نهار المواجه

الشاعر : علي زيد البدراني