مساجله بين لافي حمود الغيداني ومطلق العتيبي

[محمد بن مرزوق البدراني]

هذه مساجله بين الشاعرين الرائعين

الشاعر:لافي حمود الغيداني

و الشاعـر / مطلق خالد الحويقل العتيبي


يقول مطلق العتيبي




يالله يامنزل تبارك .. وياسين = ياعالم ٍ غيب الزمان وعلانه
ياوافي المدات .. ياقاضي الدين = انت المعين .. ونرتجيك الاعانه
بأسمك يجي للقاف قيمه .. وتثمين = وتوجه ذكرك بقدر .. وحصانه
ياخلق الادم وزوجه من الطين= ومحمله يوم اكتمل بلامانه
ابداء بذكرك لجل تخزى الشياطين = وزين المثل يسهل علي إدرجانه
ياراكب اللي جاهز ٍ عقب تمرين = الاقطم اللي فارق ٍ في خوانه
اللي عليه من الخواجه مضامين = والضامن اللي ماش غيره ضمانه
سبحان من يحمد على الزين والشين = الخالق الرازق رفيع المكانه
والا الشبح حايز عجاب الملايين = ياماحلا عبر الطريق اسبحانه
كنه بمشواره تقله جناحين = والبعد يسهل لامشاه اطويانه
مايشتريه الا الرجال الثريين = اهل الرصيد اللي رفيعن بيانه
آخر مديل الفين .. في عام الالفين = من مصنع ٍ شغله نضيف وتكانه
ياسايقه باعطيك مني عناوين = عنوان من جعله يطول زمانه
عنوان لافي ريف من جوه عانين = على الرحب يلقون قدر ورزانه
اباك توصلي سلام ٍ بعد حين = سلام من صاف الفواد ولسانه
بعد البطا اللي صار لـه حول عامين = والوصل إله عندي حبال ٍ متانه
منصا سلامي للرجال الميامين = لافي وبوه وكل حي ٍ وزانه
سلام اخص ابه الموالي والاقصين = وكل ايمنن بالطيب مسرج حصانه
يعم جيرانه .. وكل الغيادين = واللي لهم بالطيب ماقف وخانه
من دافع الاخلاص والحب والدين = وسلم الرجال اهل العقل والفطانه
ابعث لهم من باقة الورد نوعين = وخير الكلام اللي يقدم اسمانه
يهدى لمنهم بالمواجيب ساعين = والبيت من ساسه يزين ابنيانه
مادام حنا بالحياة متخاوين = أخوان بالمله وشيل الامانه
والمعرفه تربط قلوب العزيزين = اللي مسار العز لزمو عنانه
ياجب على الوافين وصل الوفيين = والوصل يمليه العـقـل والديانه
ودنياك يالافي بها العسر واللين = لو ناحرت ياعجلها قلبانه
مادامت لخير البشر والسلاطين = ومن عاش فيها شاف منها الخيانه
والرابحين الصالحين الرشيدين = اهل العقول الواعيه والذهانه
اللي على سنة محمد حريصين = وابليس ماطاعوه في مهرجانه
على مسار الحق دايم سريعين = سعي ٍ رفيع ولاسعوا بالطمانه
شرواك ياذخر الرجال الطليعين = اللي سلاح الجود حدو سنانه
يابن حمود ايامك اللي مضت وين = يامن معي عال ٍ مكانه .. وشانه
حنا على شوف المشاكيل شفقين = والا الردي يلقى حليه قرانه
نشفق على الطيب وندعيه عجلين = ودايم على الطيب تجوز الميانه
والا الردي جعله وراء دولة الصين = حيث ان ماله في سما الكون زانه
وقبل تحيات القلوب المودين = من دافع مود ٍ لسانه حصانه
وصلو على خاتم جميع النبيين = اللي عطاه الله كتابه واعانه
اللي ومرنا ننهج المنهج الزين = ورسم طريق الحق واوضح بيانه









......... ((( الرد من الشاعر/لافي حمود الغيداني ))) .........




بديت بأسم مكون الكون تكوين = المنفرد والمتحد في كيانه
رب الحجر .. رب الشجر .. والثقالين = مرسل محمد وامر ٍ باتبعانه
اللي عبيده لـه صيام ٍ مصلين = يرجون رحمة ربهم وامتنانه
وعطفه .. ولطفه .. لاغدى الخلق نصفين = ويشهد على الانسان حتى بنانه
ياناصر الرسول في بدر .. وحنين = ياجاعل لسان البشر ترجمانه
انت المعين ولاحد ٍ غيرك معين = ومن بعد ذكرك كل شي ٍ باوانه
ياراكب اللي من حفيزه اقزوزين = تــو .. ودبل زيــرو .. وون.. اصدرانه
صدّر خلال انتخابات الزعيمين = قدام بوش الابن يكسب رهانه
قبل استلام البيت الابيض بشهرين = و مجلس شيوخه .. وانظمة برلمانه
جي .. إم .. أس .. حروف وارموز .. تبيين = للمصنع اللي صممه والصيانه
احدث موديل بتكنلوجيا الصوالين = والله عطا اللي يصنعونه اتقانه
لياسرى ماضن من الليل ثلثين = وولع مصابيحه .. وولع اسكانه
كن اجماحياته شموع المحبين = في عيد ميلاد .. اوقده شمعدانه
وكن اشتغاله هرجة ٍ بين ثنتين = يخفنها بين الخجل .. واللعانه
ويشبه لياقام يتمشى على هوين = مشي الفتاه المترفه بمشيانه
ولياعطا مردومة ٍ كنها ( قين ) = قام يغنج .. ويهوس كن اغنجانه
شريفة ٍ في حفل ناس ٍ شريفين = ترقص على يالليل ادآنه يادآنه
تهز .. وتهز الخصر .. والذراعين = ومن راسها ماطاحت الاستكانه
وليامشى من نجد بين الصلاتين = مايصبح الا في حدود الكنانه
يصرخ بعنف .. لياخذ شوي بنزين = مثل صريخ صغير ٍ بالحضانه
ياسايقه بالله هالحين هالحين = قم دق سلفه .. واربط حزام امانه
حنا على رد الجمايل مضرين = حاضر بحاضر .. والتهاون جبانه
دسله .. وزدله بأشتغال الصلنصين = ولايحرك الا بآخر ازعـيتمانه
خل الحصى على حصاه .. وحصاتين = يفر من حدره فرير (السمانه)
حده على قصياه .. ياسايقه لين = تعزف قزوزه مثل عزف الكمانه
ويخلي العادم بطون الشكامين = غليون (حشاش ٍ) براسه شطانه
كنه بتفكيره .. يحرر فلسطين = ومستيسر ٍ شارون بالخيزرانه
نصه ديار طيور شلوى .. الدماسين = وقل وين مطلق .. ثم لياقيل عانه
تلقاه في بيت ٍ يذري عن البين = سلم عليه ومن لقيت بمكانه
سلام ممزوج ٍ بعـطر الرياحين = والا زباد ٍ تو جا من عمانه
ألذ .. واحلا من حـليب الملاوين = لياروحن من وادي ٍ ديدحانه
مثل الزلول الفاخره بالدواوين = ويلاعب الغربي زهر قحويانه
مقدار ربع ٍ لوهم بعيد غالين = على خفوق ٍ قدرهم ماأستهانه
عيال عود ٍ غاب راسه على الزين = ممنوح من ربه صلاح البطانه
مطلق .. وغازي .. والنعم بالشقيقين = وأخوانهم .. والله عليه وامانه
ماهـو مكفيهم لانعم .. ولانعـمين = هيف السمين اللي كثير ٍ أدهانه
واهل هلا يامرحبا فيك .. وهلين = وكل ٍ حجاجه يعجبك بضحكانه
واهل دلال قناد غال المثامين = وافضل نمونه هيله .. وزعـفرانه
كنه للضرمانه صعـوط المجانين = لياذاقه النعـسان طار إنعـسانه
واقول .. يامطلق فدوك الكثيرين = أهديتني دره .. وباقه .. ودانه
الباقه اللي من ورود البساتين = من كل شي ٍ زين فيها إذنانه
منباعها من جوف قلب .. وشرايين = وجم ٍ تصدر بالروى عـيطشانه
فيها عتب .. لكن على الراس والعين = انا مدان ومعترف بالادانه
إن كانا بالوصل معك متردين = منك السموحه راس مال الخزانه
اما تجي .. والا نجيك متعنيين = وكل ٍ على اصحابه وسيع ٍ بطانه
وصلاة ربي عد وبل الودادين = على رسول ٍ عزنا باتبعانه

[تركي الزايد]

صح لسان الشاعرين

وصح لسانك يامحمد

جزل وما تنقل الاجزل...

[محمد بن مرزوق البدراني]

المشاركة الأصلية كتبت بواسطة تركي الزايد

صح لسان الشاعرين

وصح لسانك يامحمد

جزل وما تنقل الاجزل...

الاخ تركي صح بدنك


وسعدت جداً بمرورك الجميل .

[محمد بن جعيثن]

الاخ محمد

صح لسنك ولسان الشاعرين

لك الود

[عماش الرقعي]

محمد بن مرزوق

الله يعطيك العافيه

على نقل هذه القصيدتين

لشاعرين المميزين


الشاعـر / مطلق خالد الحويقل العتيبي

والشاعر:لافي حمود الغيداني


وصح الساانتهم جميعا


لك كل الشكر


وياهلابك