حبوب للإقلاع عن التدخين...

[تركي الزايد]

السلام عليكم ورحمة الله وبركاتة


استبيح العذر من الادارة وانقل لكم الموضوع للاهميتة وراجاً الله ان ينفع به

بسم الله الرحمن الرحيم

الموضوع هذا حصري ... .. انا كتبته للفائده العامه .. اتمنى الجميع يقراه ليفيد ويستفيد ..

كتبته باللغه العاميه .. .. واعذروني على الاخطاء

كثرت الايام هذي مواضيع الاقلاع عن التدخين

ولاحظت في ناس كثير يقولون انهم جربوا كل وسيله وما نفعت معاهم

انا مدخن من 5 سنوات .. وكنت ادخن بكتين باليوم ... " مالبور ابيض"

بس تركته ولله الحمد

حاولت اوقفه كم مره

وكل ما اوقفه ... على طول بعد ساعه تجيني زي الانتفاضه وكذا لازم ادخن ..

اذا جيت افكر كيف اوقفه ...

ما اقدر اتخيل نفسي جالس كذا اتقهوى وما ادخن

ما اقدر اتخيل نفسي جالس كذا ماسك طريق وزحمه وما ادخن

ما اتخيل نفسي اشرب شاهي بدون ما ادخن

ما اتخيل نفسي اجلس مع الشباب واسولف بدون ما ادخن

ما اتخيل نفسي العب بلوت (ايام اول) بدون ما ادخن

في حاجات كثير منعتني عن توقيفه

حاولت

وجربت "العلوك" الخاصه للامتناع عن التدخين

ههههههههههه ما صمدت الا نص ساعه

جربت اللزقات او الباتشات اللي تلزقها بيدك

برضوووووا ما نفعت .. بس صمدت المره هذي ساعتين

المهم اني جربت اشياء كثييييييييييييييير

وكلها ما نفعت

قبل فتره

كلمني واحد من الاصدقاء وقالي في حبوب جديده اسمهاchantix

يقول ان عمه مدخن من 30 سنه .. ووقف الدخان عن طريقها

انا ما صدقت .. وقلت له ابي اكلم عمك

كلمت عمه وقالي كلامه صح .. وقالي انه يعرف ناس كثير وقفوا الدخان عن طريق االحبوب هذي

يقول ناس صار لهم يدخنون فوق الـ 20 سنه ووقفوه

المهم

واروح واتصل على الدكتور تبعي وقلت له السالفه وقام هو ودلني على دكتور ثاني

جا ذاك اليوم واجهز تأميني واوراقي عشان اروح لموعدي ( بامريكا يطلبون تأمين ) ورحت للدكتور

الامريكي ..

وطبعا قبل ما ادخل عنده لازم زقاره الطريق ههههههه

المهم

خلونا نشرح بطريقه مبسطه كيف الحبوب

chantix

اول حاجه ,,

## ليش الواحد يدخن ؟

الواحد يدخن .. ويستنشق النيكوتين ..

النيكوتين هذا يروح لحاجه يسمونها receptor في الدماغ

الريسبتر هذا يستقبل النيكوتين والنيكوتين يخلي الدماغ يرسل رسائل او نبضات لدماغك عشان

يخليه يفرز انزيم كيميائي اسمه Dopamine

الانزيم هذا يعطيك شعور "بالمتعه" المؤقته .. وركزوا على كلمه مؤقته ...

مؤقته... يعني تروح المتعه بعدها على طول انت تبي ترجع للمتعه هذي وتدخن زياده.. عشان كذا

الجزء اللي قلنا عنه الريسبتور يطلب المزيد من النيكوتين

عشان كذا تدخن اكثر واكثر ...

هذي بأختصار فكره التدخين

الحين ,,

# وش تسوي حبوب الـ Chantix ?

حبوب شانتكس تمنع الجزء اللي في دماغك اللي قلنا عنه اللي اسمه recptor

يمنع الجزء هذا من استقبال النيكوتين .. يعني تسوي زي الحاجز بين الريسبتور والنيكوتين

يعني لو تدخن من اليوم الى بكره .. النيكوتين ما راح يروح للجزء هذا ..

واذا النيكوتين ما راح للجزء هذا .. خلاص دماغك او الريسبتور ما راح يطلب نيكوتين بعدها

لانه بطريقه مبسطه .. خلاص ملللللللل ما يقدر يجيب نيكوتين .. يعني خلاص تلقائيا راح

يستغني عن النيكوتين

هذي صوره مبسطه تشرح اللي جالس اقوله

http://www.chantix.com/images/chantix_brains.gif

# ''طريقه استخدام حبوب chantix ?

1- اول شي تسويه .. اشتر الحبوب هذي .. او رح لدكتور وخله يوصفها لك ...

عندنا بامريكا يسمونها Chantix .. اعتقد بالسعوديه يسمونها Champix

الحبوب هذي سعرها بامريكا حول الـ 400 ريال ...

اذا شريت الحبوب راح تلاحظ ان فيها 4 علب .. علبه البدايه لونها اخضر الحبوب لونها ابيض .. و3

علب لـ الاسبوع ما بعد البدايه لونها ازرق

الحبوب لونها ازرق بعد

مده مرحله الاقلاع النهائيه = 12 اسبوع واحتمال تكون 5 اسابيع

2- حدد موعد لترك التدخين ... يعني مثلا قل بتاريخ الفلاني راح اوقف .. خلنا مثلا نقول 7-1-2008

3- قبل اسبوع من الموعدد اللي حددته لترك التدخين .. ..يعني في حالتنا هنا بتارريخ 1-1-2008

تبدا تاكل الحبوب حقت البدايه اللي

هي بالعلبه الخضراء .. تاكل حبه وحده كل صبح .. مع استمراريه التدخين .. تاكل الحبوب

وتدخن .. يعني تقدر تدخن

ما يحتاج توقف على طول ..

4- اليووم الثاني2-1-2008 .. والثالث3-1-2008 .. نفس الحاجه .. تاكل حبه وحده كل صبح ...( من

العلبه الخضراء) ------ مع ملاحظه انك تقدر تدخن اليوم هذا

5- اليوم الرابع ,, 4-1-2008 ... تاكل حبتين وحده الصبح ووحده الليل ( من العلبه الخضراء ) ------

مع ملاحظه انك تقدر تدخن اليوم

هذا

6- تستمر تاكل حبتين باليوم حتى تخلص العلبه الخضراء ----------- مع ملاحظه انك تقدر تدخن

الايام هذي

7- راح تلاحظ بالاسبوع هذا .. انك ما تحس برغبه بالتدخين .. حتى راح تلاحظ لو كنت تدخن

بكتين باليوم .. راح تنقص لـ بكت واحد باليوم او

حتى اقل

وهذا يرجع للحبوب اللي بالعلبه الخضراء .. بدت تمنع الريسبتور انه يجيه نيكوتين .. حتى راح تكره

الدخان وريحته

8- الحين جا الموعد حقنا حق الاقلاع ..اللي حددناه .. 7-1-2008

باليوم هذا توقف الدخان ... وراح يكون سهل مره لأنك الحين بمرحله كره الدخان ...

باليوم هذا تبدا بالحبوب اللي بالعلبه الزرقاء .. راح تاكل حبتين زرقاء كل يوم .. لمده 11 اسبوع ..

وحده بالصبح ووحده بالليل

مع ملاحظه انك اذا جا يوم بذاك الاسبوع وحسيت انك تبي تدخن ومرره ما قدرت وودخنت زقاره

غصب هههه .. فهذا ما يعني انك الخطه هذي فشلت

بالعكس استمر باكل الحبوب هذي لمده 11 سبوع .. كمل المده .. وصدقني راح توقف ..

الحبوب طبعا يبي لك تشتريها كل شهر مره .. لان العلبه تكفي لشهر واحد ..

هذي طريقه الحبوب هذي ...

## تجربتي

- بعد ما خلصت اول اربع ايام .. بديت اكره الدخان معي اني اقدر ادخن ..

صرت ادخن في الساعه زقاره .. بدل ما ادخن 4 زقاير بالساعه ...

صرت مابي اشتري دخان

صرت اتمنى يجي اليوم اللي انا حددته عشان اوقف الدخان ..

جا ذاك اليوم .. ووقفته ..

اول يوم .. عادي ما همني .. جا اليوم الثاني .. وبالغلط خذت زقاره .. بس يوم خذتها ما كملتها ..

كرهتها . كرهت ريحتها كرهت كل شي فيها ..

والحمد لله انا موقف الحين .. وصرت اكره الدخان كررررره

لو الزقاره انسان .. مستعد اذبحه وادخل السجن عشانه الحين ههههههههههههه وش رايكم

بالتشبيه

## تجارب غيري ::

- هذا واحد اسمه براين يقول

" كنت ادخن بكت ونص يوميا لمده 30 سنه .. الحين راح شهر وانا استعمل الحبوب هذي وما دخنت ولا زقاره .. يقول اي رغبه تجيني بالتدخين .. تروح في ثواني .. الحبوب من جد تخليك توقف وتكره الدخان .. اي حاجه جسديه ممكن يحس فيها جسدك بعد ترك التدخين .. تروح عنك بعد 4 اسابيع .. وخلاص انتهى الموضوع وانتهينا من الدخان "

- هذا واحد ثاني اسمه سكني .. يقول

" حددت موعد الاقتلاع عن التدخين في اول يوم من شهر جانوري ... وبديت اكل الحبوب قبل اليوم هذا بخمس ايام .. لقيت اول الايام شوي صعبه لكني الحاجه العجيبه اني قدرت اقلل مقدار الزقاير اللي ادخنها ... كنت ادخن بكتين باليوم لمده 30 سنه ... الحين في 4 ايام الاولى دخنت بكتين في 4 ايام !!! .... كل زقاره اخذها احس اني اكرها ... والزقاره اللي بعدها اكرها زياده وزياده .. بالحقيقه لقيت نفسي احاول ابعد عن الدخان والبكت مابي اشوفه

صرت مابي اشرب قهوه عشان ما افكر بالدخان ... وصرت اذا شفت احد يدخن .. انحاش من عنده مابي اشم الريحه اللي اكرها ريحه الدخان .. الحين صار لي سبوعين ما دخنت ولا زقاره .. اتمنى التوفيق للجميع "

- هذا سيندي .. يقول

" بديت اكل الحبب قبل 15 يوم .. اخر زقاره خذتها قبل 7 ايام .. شي عجيب ومذهل كيف الحبوب هذي باول 7 ايام وانت تدخن ما تحس بالمتعه اللي تحس فيها اول .. انا حاليا متفاجئ كيف اني ما ادخن الحين

.. اذا شربت قهوه او اي حاجه صرت ما افكر بالزقاره ابدا .. "

- طبعا كلهم اشتركوا بحاجه وحده انهم جربوا كل شي وما نفع معهم .. بس الحبوب هذي نفعت ..

اعتقد اني خلصت من الموضوع

الموضوع كتب للفائده العامه .. اتمنى عدم النقل بدون ذكر المصدر

وياليت نبدا حمله لمقاطعه الدخان ..

اللي يعرف احد من الاقارب او الاصدقاء يدخن

ياليت يخليه يشوف الموضوع هذا

على فكرة سعر العلبة 177 ريال

منقووووووووووووووووووووووووووووووول

[محمد بن مرزوق البدراني]

الاخ تركي جزاك الله خيراً ووفقك الى مايحبه ويرضاه

وأن يجعل هاذا الموضوع في موازين حسناتك

تحياااااتي

[سفير الحميدات]

الاخ تركي الزايد بيض الله وجهك على هالموضوع اللي ما احد التفت له

لكن انا عندي حبوب اقوى من حبوبك الا وهي الالتجاء الى الله والدعاء
واخلاص النيه لله واسأل مجرب انا ولله الحمد لي سنتين تاركه واكره شي
اشوفه التدخين بس عانيت لين تركته مافيه لزقه ماشريتها مافيه حبوب ماشريتها
بالمختصر سويت المستحيل وبالاخير تركته بالعقل.
الطريقة اللي كنت اسويها اني اشتري بكت وارمي منه عشر زقاير واقول لنفسي يالله
باقي لك عشر زقاير وفرقيها على راحتك تبين تقضينها بساعتين والا عشر اهم شي غير
هالعشر مافيه وبعد اسبوع اخليهن 8 وهكذا الين وصلت الى زقارة وحدة باليوم وبقدر
الله صابتني سخنه قعدت اسبوع ماتحرك عرفت انها رحمة من الله وبعدها تركته نهائيا.
بس الاهم من هذا كله كنت مسوي طريقة الا وهي اي بكت اشتريه اروح اتصدق
بكثر الفلوس اللي شريتها فيه يعني انا اشرب بكتين دفيدوف يعني اشتري بــ 12 ريال
واتصدق بــ12 ريال يعني اصرف 24 ريال يوميا والحمد لله ربي وفقني.


اخي تركي جزاك الله خير الجزاء وهذي المواضيع والا فلا
وهذي عوايدك
تحيااااتي

[مشاري البدراني]

الاخ/ تركي

يعطيك العافيه والله يجزاك خير على الموضوع المفيد



تحياااااتي وتقديري

[عادل البدراني]

الاخ تركي الزايد

الله يعطيك العافيه

ودمت بود