قالوا علامك ضايق الصدر محـزون=بالله خبرنـا عـن اللـي جـرالـك
النصر يبكـي والجماعـه يغنون=يتشمتـون ان الهـوى ماصفالـك
لامنهـا ضاقـت عليـك يتفضـون=يالشاعر المعـروف هـذا مجالـك
قالوا وانـا ماطيعهـم لويموتـون= لورحت في ليلٍ من الحـزن حالـك
أنا اشهد اني فيك يانصـر مفتـون= يـزود مـع زود الليالـي جمالـك
فتحت لك قلبٍ من الحب مشحـون= وسديت عن غيرك جميع المسالـك
ماني من اللي بالهزيمـه يغيبـون=على يمينك يـوم صـاروا شمالـك
صدري بحبك يااصفر اللون مسكون=وقلبي ثلاث عقود ضمـك وشالـك
ياعالي البنيـان ناطحـك مجنـون=مثل الجبل ماحـرك الريـح جالـك
علمتنـا كيـف الحبايـب يحبـون=وان التناحر هـو طريـق المهالـك
تعيش واصحاب المصالح يروحـون=من ينكر افضالك مهو مـن عيالـك
ناسٍ ليا شافوك فايـز يحضـرون=لكن تغيـب وجيـه ياشـان فالـك
تطلع صورهم بالجرايـد يهـذرون=هم واهميـن ويحسبونـك لحالـك
حتى المزيف صرت لرضاه مديـون=يانصر وش باقـي بعـد ماجرالـك
يقول يبغى يجمـع اثنيـن مليـون =حركه (بمبـا) عليـك ورقالـك
امشوا جميـع وجعلكـم ماتـردون=روحوا لكفر الشيـخ والا الزمالـك
يانصر يالتاريخ هم كيـف يقـرون=ولايفهمون ان الوفا مـن خصالـك
مات الحبيب اللي به النصر مضمون=الله يـوم اذكـر زمـانٍ مضـالـك
حبك معه ياسلوة الـروح مدفـون=وبقلوبنـا حبـه نشيلـه كـذلـك
لوهو هنا ماجاك (بمبا) و(تيمـون)= تقصـر يديهـم ماتجيـك وتنالـك
يانصـر قـل لاحبابنـا يستقيلـون=بلسان جمهـورٍ نصـرك ودعالـك
يانصر قـل لاحبابنـا يستريحـون=من فعلهـم حتـى عـدوك رثالـك
يانصر ياكل الغلا يااصفـر اللـون= حبي بدالـك باولـه وانتهـى لـك
خذها عهد ماهي وكالـة يقولـون=أنـك بقلبـي والزمـن ماينـالـك
والله لـو تهـزم ثمانيـن مليـون=مـره فـلا دورت نـادي بـدالـك