سلام يا ربع الوفاء والطيب والراي السديد = الليله ابغى ملعبة كل يعد اخبارها
مادام بيت العز يا اهل العرف له ساس جويد =ما يختلف لو الليال القشر ثار غبارها

يامرحبا بك عد ماهز الهواء خضر الجريد= اقولها باسم الرجال اللي طوال اشبارها
الا مر بيدين العزيز المنفرد رب العبيد= سبحانه اللي يعلم احوال البشر واسرارها

تسلم لنا واللي على بالك يعبره القصيد = لك مدةٍ وسط البلد معروف من تجارها
البدو لو شافت ربيع ماصيحت تبغى الشديد= واللي يصرر درها اكيد لجل حوارها

حنا على القانون نمشي ونتبع الراي الرشيد = ومن الحدائق ما قطفنا الا جميل ازهارها
ما كل من عس الربيع يجيك بالعلم الاكيــــــد = الناس طمعت من بعضها يوم شبت نارها

ماقول فيك اقصور يالنشمي على الزايد تز يد= تقطف من اخيار الغصون اليانعات اثمارها
في تالي الايام ماندري من اللي مستفيد= والناس ماضيع بصايرها ياكود افكارها

يا الله توفق ربعنا اللي قريّــــب والبعيــد = يا عالم سر البشر كبـــارها وصغــــارها
قالوا ربيع وقلت أ بد هذا دهر قلته واعيد = والناس حالة في مواقفها خباث اشرارها

يا الله توفق كل مسلم خاف من يوم الوعيد= يعالم احوال البشر اطوالها واقصارها
الناس ملت من ثيابٍ باليه تبغى الجديد= من حقها ياصاحبي من حقها تختارها

هاذي حقائق واضحه احد شقي واحد سعيد = واحد المنايا ماتزوره مير راح وزارها
الناس من زايد طمعها ودّها كل يوم عيد = لكنها الدنيـــــا كـــذا كل يطــــق بطـــارها

كم واحدٍ روح من الدنيا ولايحسب فقيد= يوم المنايا تنحسب باجالها وقدارها
بعض الدعاوي تستوي عند الذكي عند البليد= يمكن عمار الدار يصلح من بعد دمارها

الموت والله ياصنت موجود في شق الوريد = والمسعد اللي يدخل الجنّة بوسط ابرارها
والله يا بعض الدعاوي كلها ظلم وكيد = وياكم دار اذا دمرت تصعب على عمارها