يــااهـــل الــغـــزل بالله لا تـحـرقـونــه=المـلـح لا كـثّـر عـلـى الـــزّاد مـاطـيـق
كـــلٍّ دهـــن راســـه وكـحّــل عـيـونــه=وقــام يتـغـزّل فــي بـنــات المخـالـيـق
بالله يـــا اهـــل الـعـولـمـة لا تـجـونــه=خـلّـوه يـدلـه فـــي قـلــوب المطـالـيـق
حنّـا عـرب والعـرض واجـب نصـونـه=يعنـي يـراق الـدمّ والعـرض مــا ريــق
الـجــار نـرفــى خـلّـتـه مــــا نـخـونــه=وتنـكـف ركايبـنـا عــن الـعـدّ لا ذيـــق
الله يـقـطــع شـكـلـهـا مــــن نـمــونــة=قـــومٍ تـفــزّ لـغــرّة الــجــار وتــويــق
واشوف (بعض) الجيلٍ خابـتْ ظنونـه=مــا بيـنـهـم ونـويـعـم الـخــدّ تـفـريـق
وش يفـرق الجنسيـن غيـر الخشـونـة=من عهد ابونا آدم ومن عصر الاغريق
باعـوا قيمهـم فــي حــراج (المـرونـة)=بـاســم الـتـمـدّن وانـفـتـاح المغـالـيـق
وش يـنـفـع الـرّجــال شـكـلـه ولـونــه=لا صـار مـا يفـتـك فــي حــزّة الضـيـق
(عنـتـر) ســواده فــارقٍ فــي سـنـونـه=والفـعـل شــوّق زاهـيــات العـشـاريـق
يا بنت شومي واقصـري الشبـح دونـه=لـلـريــم هــقـــواتٍ تــبـــذّ الـتـفـافـيـق
شـومـي لشـيـخٍ مــا تـزعـزع ركـونــه=لو زعزعت رضـوى وابانـات وطويـق
فــي ذمـتـي مـــا تطعـمـيـن المـهـونـة=مثـلـه فــلا يمـكـن يـخــون المـواثـيـق
تــعــوّدت شـــــلّ الـثـقـيـلـة مـتــونــه=ورثٍ مـن اقـصـى جــدّ مـاهـو بتلفـيـق
وان كــان عــن دارك تـعــدّت مـزونــه=فالجـوهـرة تبـقـى بـجـوف الصنـاديـق
ولاّ ترمّـالـك عـلـى كـــرت ( شـونــه )=اخير لك من شـوف بعـض العشاشيـق