يا لله يا فراج ضيقات وكروب =على عبيدك في مواقف صعيبه
تفرج لعبدٍ يوجس القلب مضروب =بين الضلوع العوج جاته عطيبه
على ثمر قلبه صغيّر وحبوب=حزة فطامه صار يشكي إ قليّبه
والعظم ناحل منه الحال مسلوب=ضيق النّفس خلى إعلومه قريبه
أنعم عليه بصحةٍ تملى الثوب=يا لله يا للي كلنا نلتجي به
في مركزٍ كله تخصص للقلوب=أمر ولى العهد يسعى طبيبه
يبذل جهوده والولي يقضي النوب =ما خاب من يلجي لربه يجيبه
والحمد للمولى قضوا كل ماجوب =دكتور ماهر و الموارد رطيبه
بأفضال ابو خالد ذرا كل مرعوب=مواقفه تشفى القلوب التعيبه
ما صك بابٍ للعرب فيه مطلوب=في خدمة الشعب السعودي حبيبه
يا لله يا مسلم من السقم أيوب =عقب المرض صارت عظامه صليبه
يا مرجعٍ يوسف على أبوه يعقوب=عقب الفراق اللي سنينه صعيبه
إحفظ لنا سلطان سلطان القلوب=والعز و الصحه عساها نصيبه
وتجعل له الميزان راجح بلا ذنوب=وقت اللقا بالعرض يوم المصيبه
و إجز الطبيب اللي على القلب منصوب=بإحسان من فضلك ورحمه وطيبه
دكتور من زهران بالحيل موهوب=وفن الإدارة أتقنه يـقـتـدي به
دكتور نفخر بك على كل نبنوب=و لدوس أيضا فارسٍ تـنـتـخي به
وأجز الهويدا بالعفو منك مطلوب=و إلطف بروحه يوم ركز النصيبه
أنتي فخر في موطني شرق وجنوب=أنتي وسامٍ من مفاخر عتيبه
كم إبتسامه أ نورت عقب الغروب =من بعد ماصرتي عليها طبيبه
والعاملين بمركز القلب لو نوب=أنعم عليهم ياجزيل الوهيبه
واجعل لهم في جنة الخلد مركوب=مثل الارايك في جنان عشيبه
وصلاة ربي عد ما خط مكتوب =وإعداد ما سال المطر في شعيبه
علي نبيٍ وضح الدين بإسلوب =أنذر وحذر للعقول اللبيبه