مساجلة بين الشاعر عوض بن ركيان والشاعر ابن خشمان
بسم الله الرحمن الرحيم هذي قصيدة مسندها الشاعر/عوض بن ركيان البدراني للشاعر الكبير/غازي بن خشمان الغرابي الحربي يقول فيها الشاعر عوض : ليا قلت الشيمات عند المعاثيــر *** نصيت أبو مشخص كريم السبالي عزن لربعه في ليالــــي المعاسيــــر *** يرسي كما ترســي رواسي الجبالـــــي ماهو من اللي يقدمـــون المعاذيـر *** الطيب وهبه من عزيز الجلالــــي عطه الكتاب وبلغـــه بالتفاسيـــر *** الله يفكه من صـــدوف الليالـــــي أجاره اللــه من جــميع العواثيـــر *** أطلب ولي العرش منشىء الخيالي ياغــازي الخشمان زبن المخاسير *** بذلت بي معـــروف باول وتالـــي ولا يجحد المعروف غير المحاقير *** وانا مع الطيـــــــــب بحالي ومالــــــــي ولاهي كثيرة منك ريف المسايير *** فيك الكرم والجود وايضا الكمالي والكامل المعبود رب التدابير *** رب خلق خلقه بحسن العدالي الله خلق للناس عقلن وتفكير *** وهذا حسب عــرفي وهذا مجالي ماقلتها من شان جمع الدنانير *** ولا قلتها من شان كسب الريالي هذا كلام الصدق مابه تزاوير *** أصخر جزيل القاف والراس عالي وانته فهيم ومن رجال المشاهير *** وحنا نعدك من خيار الرجالي عبرت لك بالقاف جملة تعابير *** مثل الذهب صافيه من راس مالي أنته تعرف الوارده والمصادير *** واشره على مثلك من الناس غالي الى حصل بالنفس من الوقت تاثير *** نصيتكم ياشيـــخ من ضيق بالــــي همن يدق القلب دق المسامير *** وشتلت من وقتي حـــمولن ثقالـــي وصلاة ربي عد مزنن مزابير *** وعداد مانبت الشجـــر بالرمالـــــي وهذا رد الشاعر غازي بن خشمان على القصيدة : يامرحبا عدد نبت العثامير *** حييت ياخط الصحيب المثالي عداد نبت الروض حل المخاضير *** وعداد ماهبت هبوب الشمالي جاني كتاب حط بالقلب تاثير *** من صاحب يثني علي وشكالي كلام احلى من حليب الاباكير *** والذ من نقع الغدير الزلالي الصاحب اللي له معزة وتقدير *** له عندنا قيمه وله قدر عالي يفدونه اللي مابهم للجبر خير *** اللي عليهم من عملهم وبالي يابن الرجال منزْحين الطوابير *** حملتني بالمدح فوق احتمالي لا تقولي فعلك حصل فيه تقصير *** ولا تحطني طيب زماني إلحالي صور لنا الواقع بالامثال تصوير *** تبرا به الذمة وينهى الجدالي خل الذهوب يفاختون المداوير *** أقفل طريق تجار قيل وقالي اللي لهم عادة بشن المغاوير *** بياعة الذمة رموث الحبالي واللي فعلنا ياعشير الغنادير *** فعله وجب من واجبات الرجالي ومن شان طيبك صار للطيب تبرير *** ولاش عندك علم ماهو بخالي ياطيب الرفقة عشير المناعير *** الطيب مع مثلك كمال وجمالي ياعوض ماتخفى عليك الأسارير *** رجلن بلا معروف صندوق خالي وانته تعرف العلم من دون تفسير *** جربت بيض أيامها والليالي الله يعدينا صدوف العواثير *** تعبيرنا وتالي العمر بالي يامطهر الذمة من الذنب تطهير *** نطلبك عفوك ياعزيز الجلالي |
صح لسان الشاعرين
عوض بن ركيان البدراني وغازي بن خشمان الحربي ويعطيك العافيه يا سمو الحرف تقبل مروري |
بسم الله الرحمن الرحيم
الاخ سمو الحرف سميت وعانقت السماء بنقل هذه القصائد العذبه فشكر لك وصح لسان شاعرنا الكبير عوض بن ركيان وكذلك الشاعر غازي الحربي لك الود |
صح لسان الشاعر عوض بن ركيان البدراني
و لسان الشاعر غازي خشمان الحربي سمو الحرف يعطيك العافيه وبيض الله وجهك على ايراد هذه المساجله وتدوينها بديوان الشاعر عوض بن ركيان لك الود والاحترام |
الساعة الآن 01:10 AM. |
Powered by vBulletin® Version 3.7.1
Copyright ©2000 - 2024, Jelsoft Enterprises Ltd.
mamnoa 4.0 by DAHOM