هذه القصيدة عبارة عن معايدة أرسلتها لأخي الشاعر طلال عويض المطيري :
شوق وتهاني ليلة العيد وافراح=وكلن يهني من يوده ويغليه
حتى القصايد لابسه عقد ووشاح=يطرب لها الخاطر وتسعد لياليه
حتى المعاني كنها البرق لالاح = كتبتها من جرح تنزف معانيه
حتى العطر من دون ما نلمسه فاح=ريح الخزامى والنفل مختلط فيه
وبسبابكم صدر المعنى لكم ناح =حتى الطيور اللي على الغصن توحيه
هذا غلاكم داخل القلب ياصاح=يجبرني إني مثلك أرسل أهنيه
رد الشاعر / طلال عويض المطيري:
جات المعاني لابسه عقد الأملاح=في نظمها قال المعنى طواريه
ياصاحبي هنيت وقلوبنا اجراح=من وضعنا اللي ماعرفنا نجاريه
العيد حل ولا درت عنه الأرواح=في سوريا وفبورما مات حاديه
والحال لو انه يبي شوية اصلاح=عندي وعندك واشغل الناس طاريه
متى على الله ترجع اوضاعنا اصحاح=وترجع على قلب المعنى هقاويه
لكن على ماقيل للخير مفتاح=صبرن جميل يونس اللي يحاتيه
واختامها مبروك والطيب فواح=والقلب من حرفك تجلى شقاويه