هذه القصيدة شاركت فيها في مسابقة ملتقى حرب بمناسبة سلامة الملك وحققت المركز الثاني
عليك ياشعري تحوف المشاريه = حوف السباع اللي تراعي عشاها
تقنب على المرقاب صارت تراعيه = وتخايل الفرصه ورغبة هواها
ان كان قلبي ماتحقق مناويه = شرف غضب نفسي وغادر رضاها
كم لي وانا ذاخرك ياحضرة البيه = وانا ادري انك قدها وتحماها
واليوم جاك اللي تمنى وترجيه = افرد جناحك لاتغادر سماها
والمقصد المنشود تسمو معانيه= سلامة اللي دولته مانساها
خادم بيوت الله من الشر ينجيه = باني بناء الدوله وحامي حماها
القائد المحبوب طابت مساعيه = حب الوطن والشعب روحه فداها
حاكم بطل والحاجه اللي تنقيه = العدل والانصاف شعبه لقاها
الحمد لله بعد سارت خطاويه = الواحد اللي عالمٍ منتهاها
سلامته ريف البلد غيث يحييه = مثل المطر لاناش ديره غذاها
تبهج قلوبٍ في غيابه تناديه = حبه علق فيها وجوده عطاها
الشر زال وجعل تفنى تواليه = والخير حل وهلة العين ماها
عم الفرح بالدار واللي سكن فيه = كلٍ يفز وفرحته ماقواها
بين القبائل زاد شفنا مواريه = حضر وبدو شفنا السعد في لغاها
بان الفرح بالكون حتى مواشيه = حتى الطيور استبشرت في فضاها
والضلع صاح وكل طرقٍ يغنيه = الحمد لله يوم شفنا حجاها
اسبشري يادار باللي حضنتيه = قرب يعود وصحته ماعلاها
باقي ليالي ثم يرجع لاراضيه = ويلوح بكفه ويلمس ثراها
الله يرده بين شعبه واهليه = يبقى على طول الزمن وانتباها