كل عام وانتم بخير
أبطيت ياصوت الرعد مالك دوي = متى نبي نسمعك ياصوت الرعد
صوتك يخوف شعب ويسر إبدوي= يسري على صوتك وليله مارقد
أنا ادري إنك بأمر علام(ن) قوي = تسكن بلد وتروح وتحل إبلد
ياوجد حالي لو مزونك تستوي = ويلوح براق الخيال إبلا عدد
حتى تسيل الارض بالماء ترتوي = ونشوف بالماء كل وادي له زبد
وختار لي ديرة ودور لي خوي = نمشي مع النبت الجديد ونبتعد
في وسط روض(ن) منوة اللي يهتوي = شبيت ناري من مقابيس السعد
واللي نباها طبخ واللي نشتوي = كل(ن) على شفه وباله ماقتصد
وارتاح من ضيق المكان الضوضوي = ابعد عن الازعاج وخبار النكد
أي والله ابعد عن علوم(ن) تحتوي = ظلم وغدر واسراف مع سلب وحسد
شهب السنين أكيد تزوينا زوي = تثر على الشايب وتثر بالولد
رحماك ياربي بظلك ننطوي = يالله تجيب الخير وتغيث البلد