الاخ الغالي
فزاع البدراني
لاهنت وبيض الله وجهك على جهود المميز
والله يعطيك العافيه
اذكر لكم هذه القصه وقد حصلت الشاعر
وبدأت احداث القصه عندما اراد الشاعر ان يبني مجلس خاص للقهوه (مشب ضو)
فاخذ المعاميل وادخلها في البيت وفي ذات يوم دخل الشاعر البيت واذا بالنجر
طايح خارج البيت فلما رآه طايح بكى الشاعر وتاثر لهذا المنظر .
فأخذ النجر وادخله في البيت ثم قال هذه الابيات :
والبارحه مامسيت وادير الافكـار=وقومي جليسي يشتكي من مهونه
يشكي من الفرقى وتبديل الاخيـار=بربع كلامـه كلهـم مـا يبونـه
وسمعتنا شكواه وامسيت محتـار=والله ان اهين اللي يبي له مهونه
هذا جليسي جاذ ب كـل الاخيـار=اهل الكرم واهل الشهامة يبونـه
وان دك بي هاجوس ماهوب صبار=يرفع بصوت والمـلا يسمعونـه
ويحب شب النار في وقت الاسحار=لاهل العوايد دايـم (ن) يدهلونـه
اللي عوايدهم مع الـدرب عبـار=متنحرينـن ربـهـم يطلبـونـه
يانجر ربعك ما يغيبـون حظـار=وش قربك للـذ ل والا المهونـه
فرد عليه النجر وقال :
حطيتني في السجن من داخل الدار=في مقعدن ما شفتكـم تدهلونـه
هذامحل الهـون والوقـت بيـدار=مالي صديقـن قـال ماترحمونـه
برد فيك الشان يوم انـت تغتـار=عزوا مقامي فـي محـل تجونـه
فرد عليه الشاعر وقال:
والله ان اعزك والمعزة لهـا كـار=واني معك في العز والا المهونـه
ماني بمن هو تالي الوقـت بـوار=انا رفيقك في القسـى والليونـه
خلك على يمناي في مجلس الكار=في مجلس واهل الردى ما يجونه
في مجلس ما يدهله كون الاخيار=اللي على عزك حـراص يبونـه
لاجوك في المجلس تقادوا بالاخبار=وكل على هجسـه يقـدم فنونـه
فهذا هواك ورغبتي شوف الاخيار=ويستر حالي فـي محـل يجونـه
وصلاة ربي عد هتـاف الامطـار=وعداد برق والرعد فـي مزونـه
على النبي المصطفى سيد الابرار=شفيـع الامـة كلهـم يرتجونـه
لا جاء نهار فيه تشخيص الابصار=يسجد تحت ربه وهـم ينظرونـه
يطلب ويعطى والمخاليـق حظـار=يعطى الشفاعة لامتـه يتبعونـه
فصلوا عليه اعداد من حج واختار=وعداد من يسعى بكامـل ركونـه
وسلامتكم وعذروني على اللاطاله