[عبدالله مناور البدراني]

(تجارب الحياة)

عمت في بحر الحياة مثل ما غيري يعوم = واكتشفت إن الحياة كلبوها معركة
تجاربي فالحياة دونتها والعلوم = خذ منها اللي تاخذه واترك اللي تتركه
النصيحة واجبة يابن آدم كل يوم = والعلم اللي لك يفيد شوري عليك امسكه
قلتها وانا نصوح ما ابغى عليها رسوم= بالشعر صغت الكلام والقاف أنظم وحبكه
اللي ما يسد اللزوم مالك في مثله لزوم = ملزوم انك تحقره وخشمه لازم تفركه
ابعد عن مشي السفيه وابعد عن مشي الرخوم= ما منهم فيد ورجا ولا منهم تلقى بركه
لا يغرك ضحكهم لا تنخدع بالهدوم = والله ما عندك أحد.... والبيبان مصككه
دوّر على أهل الكرم والوفاء نسل القروم= رايهم راي ٍ سديد والفعول محنكة
والرجال الراسية كلن بحمله يقوم = والرجال المهزلة دربكة في دربكة
طبعك خله مرجله وبفعالك خلك عزوم= لا يحسونك ضعيف وتضحك فيك المضحكة
الشماتة للرجال فا لحشا نار ٍ ضروم = احذر عسى ما تجيك وتوديك المهلكة
دايم خلك طير حر فالسماء عالي يحوم = والضعايف ليتها صيد بندق وشركة
والحذر كل الحذر لا يكثرون الخصوم = خلك حكيم وفطين لا تجي للشربكة
سرك لا يظهر أبد خلك لسرك كتوم = خوفك لو قلته لحد ينشره بالمملكة
الغضب عنك اتركه في طبعك خلك حلوم = تاخذ حقك بالوفا بالعقل والتكتكة
والمبادي عندنا مالها سعر ٍ وسوم = المبادي ثابتة لاهي كذب وفبركة
والخطأ افهم ترى ما واحد منه معصوم= الخطا كل الخطا تعرفه ثم تسلكه
واصبر على ما يجيك من مشاكل أو سقوم= هذه سنة الحياة فيها سهل ولكلكة
مره برد وزمهرير ومره كَنــَّه مع سموم = الله خلق كل شي والله وحده يملكه
انظر فجأة فالسما يمتلي عج وغيوم = وبلحظة راح السحاب سبحان اللي حركة
والمجد اطلب هامته لا تقنع دون النجوم= حتى لو يصعب عليك بالصبر انته تدركه
واعلم إن الفانية ما بها شي ٍ يدوم = البقا فا الآخرة .... يا جنة أو تهلكة
= شعر / ضيف الله البدراني (أبووليد)