عبدالله زويبن المعمري

[محمد ابراهيم البدراني]

سميت باسم اللي عباده ترجاه = قاضي حوايجها وسامع نداها
علام غايات القلوب المخفاة = يسمع وياراها بغبة دجاها
بالليل طماس المعالم بظلماه = الذرة السودا عيونه تراها
يالله ياللي مالنا غيرك إله = نفسي بعفوك لاتخيب رجاها
هاض الضمير وجاب غيبه من اقصاه = وجر الهجوس وجابت اللي وراها
من ظامر ماينكسر وزن معناه = الليا بغت تنعاج يقعد صغاها
على السنود يحدها لين ترقاه = يبعد مشاحيها ويقطر قداها
يافزعة النخوة بليا مراواه = الليا جذبها صوت داع دعاها
يم الحميدي من يوصل لي وصاه = فزعة ويلقى عند ربي جزاها
تزيد حسناته وتمحي خطاياه = عن كل خطوة في سبيله مشاها
من فوق جمس يقطع الريد ممشاه = سود الخطوط الليا استقامت طواها
يخاف منه اللي مع الخط يقداه = يمكن يطير وسرعته ماقصاها
يقصر بمشيه خوف ماهو مداراه = البيّنه يجي الكمين بتقاها
كم واحد بالخط حانت مناياه = قدمه تحراله وهو مااحتراها
يمشي برفق وخافي الغيب لله = والليا أكتفت بالله نفس كفاها
من ديرة أهل العدل وأهل المساواه = بالشرع بين الشعب يحكم قضاها
يلقى بها الخايف عن الخوف ملجاه = ويدينهم كلٍ شعب من عطاها
بالكف كف مدور الخير تملاه = وبالبطش والتخويف مااومة عصاها
هي مخلصه للشعب ودور ارضاه = والشعب كله مخلص في ولاها
الليا ارتفع صوت المواذين واوحاه = بمكبرات الصوت ترفع نداها
أجاب من نادى بخير المناداه = كلٍ يموت وحاجته ماقضاها
صلى الصلاه ودق سلفه وحماه = الفجر سامك والنجوم بسماها
مشى ومر أول محطة وعباه = ورصص كفراته وعااااير هواها
خطه يمر سدير والوشم ياطاه = وروس الطعوس الحمر يبجد قراها
ينسف عنيزه كلها عند يسراه = عنها تيامن والبدايع وطاها
والليا دخل بالسوق قبل يتعداه = للاحمدية جاه خط ونصاها
من دونها ماعال عنها ولاتاه = ومن يوم روّح مانشد لين جاها
يلفي على اللي يمدحه كل من جاه = في سمعته كل القبيله تباها
للجار والزوار سمحٍ محياه = الطيب طبعٍ فيه ماهو مضاها
شيخ جلاليب الذبايح تمناه = الليا برد بالسوق سوم عملاها
الليا وقف سوم الكبوش المرباه = زوّد على سوامها وأشتراها
أبوه قبله في زمان المعاناه = يوم السنين اللي يعجز قساها
يكرم من اللي في مراحه ومخباه = يملا البطون اللي تخافق كلاها
يعذب المحماس والقدر يملاه = لو تاصل الاسعار ذروة غلاها
وصى وريثه في جواهر مزاياه = شبلٍ وقف من دونها وأحتماها
كل العلوم الطيبه طاب مسعاه = من التلاشي والضياع أحتواها
في وقتنا اللي فيه ناس مسماه = طاحت هممها وأنخفض مستواها
منهم رجال بالقدايم لهم جاه = الليا لفت للجاه ماأحدٍ نكاها
كم واحد يسوى النقا والمثاراه = خلي لسحب يدينها عن قراها
مروية حدب السيوف المحناه = من دم اقاربها بثار أخوياها
يذكر بهم ميزات حكام وقضاه = ومدات اجاويدٍ يورخ سخاها
وعيلات عدوانٍ قواطيع وطغاه = يكره بشرسات المعارك لقاها
وهيبات غابات الاسود المضراه = ومن السباع عيافها ومعداها
معهم لها قصة وفاء مالها اشباه = كلٍ سمع فيها وكل رواها
عقال جهال وعيان وعصاه = تهاب عيات العرب من عياها
للحاكم الجبار ماساقوا الشاه = ولاتدفع العاني لشيخ حدداها
اليوم أشوف العلم من يمهم باه = أمجاد اوايلهم عطتهم قفاها
أحدٍ هدم صرح البيوت المبناه = وأحدٍ على سابق بناها بناها
يامنقع الشيمه .. مقر المحاماه = يامبتدا الفزعة ويامنتهاها
يامن نضاهي في فعوله مضاهاه = يوم القبايل تفتخر بومراها
كم مشكلٍ بين القبيلة تلافاه = وكم خلة بين الجماعه رفاها
يحلها يوم إن راع المحاباه = يشقر عصى ربعه ويسلب لحاها
يحل صعبات العقود الملواه = الليا وقف دون اللزوم أحتماها
الليا وقف يرسي على الموج ماطاه = ويقطع بحور يقلب السفن ماها
عن كسبة النوماس والطيب يمناه = لو يعترضها عايق ماثناها
حدٍ تقف عنده وحدٍ تعداه = كن القمر في كفها من رهاها
نفس بفعل الطيب والجود مغراه = ومن التكبر والتغطرس حشاها
حفيد شيخانٍ طحاطيح ودهاه = حامت بعاني جارها من وفاها
في صفه مايونس الجار مجفاه = والورع من جهالهم ماشكاها
والليا غزتهم خيل قوم مفاجاه = وفادت وعادت مع طريق مغزاها
ولحقم على شعبن تنازا منازاه = اصايلٍ در العشاير غذاها
وتعاقبن سهوم فرسان ورماه = وبيعت جلايبها بحومة وغاها
فادم وردم بوشهم يم مفلاه = وشريدة الفرسان بس منعاها
ياريف من جت له من البعد تنخاه = تصرخ وتنسى من غضبها حياها
على ولدها يوم قرب لمثواه = تنخى وتستجدى ولا أحد جداها
ووقفت معها يازبون المخلاه = ياعزها ياسترها ياذرها
بالجاه من خصمه تسببت بعفاه = وطلع وسجنه مدته ماقضاها
وتم الكلام وزبدة العلم تلقاه = برساله ماقدمك أحد قراها