لي مدتن وابواب فكري مغاليق=عن ساحة(ن) لملازز الخيل ميدان
اقرا واتابع مانظموه المطاليق=اللي قوافيهم يثيرن الاشجان
احدن تصافقبه بحور العشاشيق=يشكي مضارب شلف خدرات الاعيان
واحدن يترجم مالزا بالمعاليق=وعن مايكنه فكله عشر بيبان
واحدآ بلا داعي يجر الطواريق=لأتفه سبب يرخي رسن بنت ريمان
وانا دعاني من رقى قمة طويق=عبر عن احساسه بعذبات الالحان
فتحت لاجله فاخرات الصناديق=وحطيت لحصان الوفا سرج وعنان
ويامرحبا عد الغصون المواريق=حاضر بحاضر جتك من قلب ولسان
انشهد ان المدح في مثلك يليق=ياكاسب الجزله وياعالي الشان
مثلك وفاه يطوق القلب تطويق=ومثلي يحفظ الطيب لطيور حوران
معيه على الخوه عهود ومواثيق=ورثن لبوي وورث جدي كحيلان
من طاب طبناله على اليسر والضيق=مااصد واعطيه العلابي والامتان
ون شفت روس رماح خصمي مذاليق=من فوق راسه نرخي السيف شامان
وانا احمد الله مابرجلي مسابيق=تتردني عن منتدى ذرب الايمان
لكن حساباتي تبى شوي تدقيق=ولاودي ازعل خاطر فلان وفلان
وطبع الليالي بين جمعن وتفريق=ويبقى الوفا من بين الاجواد عنوان