يا حبيبي يا شذى عطر الزهور
عطر زهرة ماتشابه للزهر
طلتّك مثل القمـر ضـي ٍ ونـور
تشبـه اشعاعه لـيا مـنه ظـهـر
الليـالي مـظـلمة كـل الشـهـور
بس ضوّك يا قمرنصف الشهر
في محبتنا بنيت اكـبر جسـور
وانت تهدمـها خسارة ياقهر
تغرق العطشان في وسط البحور
ليه ما ترويه من جـنب النـهر
كيف قلبك مابه احساس وشعور
لو حـديد ٍ صلـب يمديه انصهر
شوف قلبي من محبتكم صـبور
وشوف عيني كيف محرقها السهر
كيف أنا بصبر على صدك ادهور
كيف أنا بقواه مع طول الدهر
مايسوق الرجل من صابه كسور
ولا يشيل الحمل مكسور الظهر
آه يا حظي غدى معك امعثور
ول ما عمره ولو يوم ازدهر
كنت اخـفّي حـبـكم عن الظهـور
باح سدي قلتها سـر وجهـر
قلت احبك وانت من زود الغرور
تحسبني عـاشق ٍ فـيك انبـهر
اعرف اني مثل صقر من الصقور
كلما ضاقت به الديرة شهر
شعر : فـهـد البــدرانـي